घरबिजनेसऔद्योगिक कोर सेक्टरच्या वाढीचा दर १०.९ टक्क्यांवर

औद्योगिक कोर सेक्टरच्या वाढीचा दर १०.९ टक्क्यांवर

लोहखनिज, कोळसा, वीज, सिमेंट उत्पादनात मोठी झेप

देशाच्या औद्योगिक अर्थव्यवस्थेसाठी सकारात्मक चित्र समोर आले असून, ऑक्टोबर महिन्यात आठ प्रमुख पायाभूत उद्योगांसह लोहखनिज क्षेत्राच्या एकत्रित उत्पादनात तब्बल १०.९ टक्क्यांची वाढ नोंदवण्यात आली आहे. गेल्या ३१ महिन्यांतील ही सर्वाधिक वाढ असून, सप्टेंबर महिन्यात हा दर ८.२ टक्के होता. विशेष म्हणजे, गेल्या वर्षी ऑक्टोबरमध्ये या क्षेत्राची वाढ केवळ ०.८ टक्के होती. त्यामुळे यंदाच्या आकडेवारीवर अनुकूल आधारपरिणामाचाही प्रभाव आहे. कोळसा, वीज, सिमेंट आणि लोहखनिज उत्पादनातील वाढीने औद्योगिक क्षेत्राला मोठा आधार दिला आहे.

क्षेत्रनिहाय आकडेवारीनुसार, लोहखनिज उत्पादनात सर्वाधिक २६.४ टक्क्यांची वाढ झाली आहे. त्यापाठोपाठ कोळसा उत्पादन २३.१ टक्के, वीज निर्मिती २१.६ टक्के आणि सिमेंट उत्पादन १५.४ टक्क्यांनी वाढले आहे. पोलाद उत्पादनात ७.३ टक्के, तर रिफायनरी उत्पादनात ३.४ टक्के वाढ नोंदवण्यात आली. विशेष म्हणजे, सिमेंट उत्पादनात सलग चौथ्या महिन्यात दुहेरी आकडी वाढ कायम राहिली आहे. बांधकाम, पायाभूत सुविधा आणि औद्योगिक प्रकल्पांमधील वाढत्या हालचालींचे हे महत्त्वाचे संकेत मानले जात आहेत.
हे ही वाचा:
मेक्सिकोमध्ये मोस्ट वाँटेड ड्रग्स तस्कराच्या अटकेनंतर हिंसाचाराचा भडका

कसोटी क्रिकेटमध्ये भारताचे ७०० धावांचे पंचक

भारताने ७२० धावांचा डोंगर उभारून न्यूझीलंडविरुद्ध घेतली पकड

पुणे बनतेय देशाचे ऑटोमोबाईल हब

मात्र, सर्वच औद्योगिक क्षेत्रांची कामगिरी समाधानकारक राहिलेली नाही. खत उत्पादनात १२.२ टक्के, नैसर्गिक वायू उत्पादनात ७.६ टक्के आणि कच्च्या तेलाच्या उत्पादनात ४.१ टक्क्यांची घट झाली आहे. विशेष म्हणजे, खत उत्पादनातील घसरण सलग आठव्या महिन्यात कायम आहे. पश्चिम आशियातील संघर्षामुळे ऊर्जा किमतींमध्ये झालेली वाढ आणि त्याचा उत्पादन खर्चावर झालेला परिणाम हे यामागील महत्त्वाचे घटक मानले जात आहेत. त्यामुळे औद्योगिक विकासातील तेजीबरोबरच ऊर्जा क्षेत्रातील आव्हानेही अधोरेखित झाली आहेत.

दरम्यान, चालू आर्थिक वर्षातील एप्रिल ते ऑक्टोबर या सात महिन्यांच्या कालावधीत प्रमुख उद्योगांच्या उत्पादनवाढीचा दर ६ टक्क्यांवर पोहोचला आहे. गेल्या वर्षी याच कालावधीत हा दर २.३ टक्के होता. देशाच्या औद्योगिक उत्पादन निर्देशांकात या नऊ प्रमुख उद्योगांचा सुमारे ४० टक्के वाटा आहे. त्यामुळे कोअर सेक्टरमधील ही वाढ अर्थव्यवस्थेसाठी महत्त्वपूर्ण मानली जात आहे. मात्र, ऑक्टोबरमधील सणांच्या तारखांमधील बदलामुळे आधारपरिणाम निर्माण झाला असल्याने नोव्हेंबरमधील आकडेवारीही महत्त्वाची ठरणार आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा

The reCAPTCHA verification period has expired. Please reload the page.

Exit mobile version