वेलिंग्टन कसोटी सामन्यात भारतीय फलंदाजांनी धावांचा अक्षरशः पाऊस पाडला. न्यूझीलंडने पहिल्या डावात केलेल्या ३६८ धावांना प्रत्युत्तर देताना भारताने ९ बाद ७२० धावांवर आपला डाव घोषित केला. या खेळीदरम्यान भारतीय फलंदाजांनी अनेक विक्रमांची नोंद केली. के. एल. राहुल आणि ऋषभ पंत यांनी शतके झळकावत आघाडी घेतली, तर संघातील इतर फलंदाजांनीही महत्त्वपूर्ण योगदान दिले. याला उत्तर देताना चौथ्या दिवशी खेळ संपला तेव्हा न्यूझीलंड २ बाद ११९ अशा स्थितीत होता. यजमान अद्याप २३३ धावांनी पिछाडीवर आहेत.
के. एल. राहुलने १३६ धावांची खेळी केली. यासह दक्षिण आफ्रिका, इंग्लंड, न्यूझीलंड आणि ऑस्ट्रेलिया या चारही देशांमध्ये कसोटी शतके झळकावणारा तो पहिला भारतीय सलामीवीर ठरला.
यशस्वी जैस्वालने ८५ धावांची खेळी करत भारतीय डावाचा पाया भक्कम केला. देवदत्त पडिक्कलने ८० धावांचे योगदान दिले, तर शुभमन गिल केवळ दोन धावांनी शतकापासून दूर राहिला. त्याने ९८ धावा केल्या.
हे ही वाचा:
सामरिक तेलसाठा खोल खोल, चंडीखोल
पुणे-लोणावळ्यातील १४ हॉटेल्ससह दोन डार्क स्टोअरवर एफडीएचा बडगा
गंभीर आहे…छाबड हाऊसच्या रेकीचे प्रकरण
काँग्रेसचे आता लांगुलचालनाचे नवे ‘टेंडर’
दुसरीकडे, ऋषभ पंतने १२८ धावांची आक्रमक खेळी केली. यासह याच चार देशांमधील चारही देशांत कसोटी शतके झळकावणारा तो पहिला आशियाई यष्टीरक्षक फलंदाज ठरला.
तळाच्या फळीतील फलंदाजांनीही चांगले योगदान दिले. अंशुल कंबोजने ३८ धावा केल्या. भारतीय फलंदाजांनी सातत्याने भागीदारी रचत धावसंख्या वाढवली. विशेष म्हणजे भारताच्या पहिल्या सात विकेटसाठी प्रत्येकी ५० किंवा त्यापेक्षा अधिक धावांच्या सात भागीदारी झाल्या. कसोटी क्रिकेटच्या इतिहासात एखाद्या संघाने अशी कामगिरी करण्याची ही पहिलीच वेळ आहे.
भारताने आपला डाव घोषित केला तेव्हा संघाकडे तब्बल ३५२ धावांची आघाडी होती. न्यूझीलंडने दुसऱ्या डावात दोन विकेट्सच्या मोबदल्यात ११९ धावा केल्या होत्या. दुसऱ्या डावातही न्यूझीलंडची सुरुवात चांगली झाली नाही. डावाची सुरुवात करण्यासाठी आलेला कर्णधार आणि सलामीवीर टॉम लॅथम शून्यावर बाद झाला. त्यानंतर डेव्हॉन कॉनवेने पहिल्या डावात शतक झळकावणाऱ्या हेन्री निकोल्सच्या साथीने दुसऱ्या विकेटसाठी ६० धावांची भागीदारी केली. मात्र, निकोल्सला पहिल्या डावाप्रमाणे दुसरा डाव मोठा करता आला नाही. तो ३१ धावा करून बाद झाला.
त्यानंतर रचिन रवींद्र फलंदाजीसाठी मैदानात आला. रवींद्र आणि कॉनवे यांनी दिवसातील उर्वरित षटके सुरक्षितपणे खेळून काढली. दोघांमध्ये आतापर्यंत ५९ धावांची भागीदारी झाली आहे. कॉनवे १३७ चेंडूंमध्ये ५९ धावा, तर रवींद्र ७२ चेंडूंमध्ये २७ धावा करून खेळत आहेत.
न्यूझीलंडचा संघ अद्याप भारताच्या पहिल्या डावातील धावसंख्येपेक्षा २३३ धावांनी पिछाडीवर आहे. त्यामुळे कसोटी सामन्याचा पाचवा आणि अखेरचा दिवस अत्यंत रोमांचक ठरण्याची शक्यता आहे. भारतीय संघ लवकरात लवकर आठ गडी बाद करून विजय मिळवण्याच्या इराद्याने मैदानात उतरेल, तर न्यूझीलंडचा संघ सामना अनिर्णित राखण्याचा प्रयत्न करेल.
