जागतिक मनोरंजन क्षेत्रातील आघाडीची कंपनी असलेल्या डिस्नेवर पुन्हा एकदा नोकरकपातीचे संकट ओढवण्याची शक्यता निर्माण झाली आहे. कंपनीचा वाढता खर्च नियंत्रित करून नफ्याचे प्रमाण वाढवण्यासाठी मोठ्या आर्थिक पुनर्रचनेची तयारी सुरू करण्यात आली आहे. याचाच भाग म्हणून कंपनीतील काही व्यवस्थापकांना वार्षिक खर्चात तब्बल २० टक्के कपात करण्याचे उद्दिष्ट देण्यात आल्याची माहिती समोर आली आहे. या खर्चकपातीचा परिणाम हजारो कर्मचाऱ्यांवर होण्याची शक्यता असून, अनेकांच्या नोकऱ्या धोक्यात येऊ शकतात. कंपनीच्या विविध विभागांना अनावश्यक खर्च कमी करण्यासाठी ठोस उपाययोजना आखण्याचे निर्देश देण्यात आल्याचे वृत्त आहे.
डिस्नेच्या या निर्णयामागे मनोरंजन क्षेत्रातील वाढती स्पर्धा आणि आर्थिक आव्हाने महत्त्वाची कारणे मानली जात आहेत. चित्रपटांच्या कमाईतील चढ-उतार, ओटीटी प्लॅटफॉर्ममधील तीव्र स्पर्धा, जाहिरात क्षेत्रातील बदल आणि कृत्रिम बुद्धिमत्तेचा वाढता वापर यामुळे कंपनीच्या व्यावसायिक गणितावर दबाव निर्माण झाला आहे. त्यामुळे केवळ कर्मचारी कपातच नव्हे, तर प्रशासकीय खर्च आणि विविध व्यावसायिक कामकाजातही काटकसर करण्यावर कंपनीचा भर आहे. विशेषतः डिजिटल मनोरंजन क्षेत्रात आपले स्थान टिकवण्यासाठी डिस्नेला नव्या रणनीतीची गरज भासत आहे.
हे ही वाचा:
मंदिरांत पुजारी बलात्कार करतात…नेहा बोराने विष ओकले
मुकेश अंबानी पुन्हा आशियातील सर्वात श्रीमंत व्यक्ती
निर्मला सीतारमण यांच्या एका विधानाने शेअर बाजारात दिवाळी!
दिल्लीत आंदोलन करणाऱ्या सहाय्यक पोलीस आयुक्ताचे निलंबन
या पुनर्रचनेचा परिणाम कंपनीच्या टेलिव्हिजन, चित्रपट निर्मिती, थीम पार्क आणि इतर व्यावसायिक विभागांवर होण्याची शक्यता आहे. खर्चातून वाचणारा निधी भविष्यातील तंत्रज्ञान, चित्रपट निर्मिती, टीव्ही कार्यक्रम आणि थीम पार्क व्यवसायाच्या विस्तारासाठी वापरण्याची कंपनीची योजना असल्याचे वृत्त आहे. म्हणजेच, कमी खर्चात अधिक उत्पन्न मिळवण्यासोबतच भविष्यातील महत्त्वाच्या क्षेत्रांमध्ये गुंतवणूक वाढवण्याचा डिस्नेचा प्रयत्न आहे. मात्र, नेमक्या किती कर्मचाऱ्यांना कामावरून कमी केले जाणार, याबाबत अद्याप अधिकृत आकडा समोर आलेला नाही.
विशेष म्हणजे, डिस्नेने यापूर्वीही मोठ्या प्रमाणावर कर्मचारी कपात केली आहे. २०२३ मध्ये कंपनीने सुमारे सात हजार कर्मचाऱ्यांना कामावरून कमी करत खर्चात ५.५ अब्ज डॉलरची बचत करण्याचे उद्दिष्ट ठेवले होते. त्यानंतरही विविध टप्प्यांत कर्मचारी कपात करण्यात आली. आता पुन्हा एकदा हजारो नोकऱ्यांवर टांगती तलवार निर्माण झाल्याने मनोरंजन उद्योगातील रोजगाराच्या सुरक्षिततेचा प्रश्न ऐरणीवर आला आहे. जागतिक स्तरावरील मोठ्या कंपन्याही खर्चकपातीसाठी कर्मचारी संख्येत बदल करत असल्याने बदलत्या व्यावसायिक वातावरणात कर्मचाऱ्यांसमोरील आव्हाने अधिक तीव्र होताना दिसत आहेत.
