देशभरातील सराफा बाजारात सोन्या-चांदीच्या दरात पुन्हा एकदा मोठी वाढ झाली आहे. जागतिक बाजारातील तेजी, सुरक्षित गुंतवणुकीकडे वाढलेला कल आणि डॉलरमधील चढउतार यामुळे मौल्यवान धातूंच्या किंमतींनी नवे उच्चांक गाठले आहेत. ८ मे रोजी जाहीर झालेल्या ताज्या दरांनुसार, दिल्लीसह देशातील प्रमुख शहरांमध्ये २४ कॅरेट सोन्याचा दर प्रति १० ग्रॅम ₹१.५३ लाखांच्या पुढे पोहोचला आहे. तर चांदीचा दर प्रति किलो ₹२.७० लाखांच्या घरात गेला आहे.
राजधानी दिल्लीमध्ये २४ कॅरेट सोन्याचा दर ₹१,५३,१६० प्रति १० ग्रॅम नोंदवला गेला. तर २२ कॅरेट सोन्याची किंमत ₹१,४०,४१० वर पोहोचली. काही दिवसांपूर्वीच दिल्ली सराफा बाजारात सोन्याच्या दरात ₹६०० ची वाढ झाली होती. त्यामुळे गुंतवणूकदार आणि ग्राहक दोघांमध्येही चिंता वाढली आहे.
हे ही वाचा:
सत्तास्थापनेसाठी DMK-AIADMK ला संधी दिल्यास TVK आमदारांचे राजीनामे?
पाकिस्तानी सैन्याकडून पाच बलुच नागरिकांचे अपहरण
छत्तीसगडमधील नक्षलमुक्त पोलमपल्लीमध्ये कायमस्वरूपी रेशन दुकान सुरू!
कॉर्पोरेट जिहाद प्रकरणी आरोपी निदा खान सापडली!
मुंबई, कोलकाता, पुणे आणि बेंगळुरूमध्येही सोन्याचे दर मोठ्या प्रमाणावर वाढले आहेत. या शहरांमध्ये २४ कॅरेट सोन्याचा दर ₹१,५३,०१० प्रति १० ग्रॅम इतका नोंदवला गेला आहे. २२ कॅरेट सोन्याचा भाव ₹१,४०,२६० वर पोहोचला आहे. दुसरीकडे, चेन्नईमध्ये सोन्याचे दर सर्वाधिक आहेत. येथे २४ कॅरेट सोन्याचा भाव ₹१,५३,८४० तर २२ कॅरेट सोन्याचा दर ₹१,४१,०२० प्रति १० ग्रॅम इतका झाला आहे.
फक्त सोनंच नाही तर चांदीच्या दरातही मोठी तेजी पाहायला मिळत आहे. ८ मे रोजी चांदीचा दर प्रति किलो ₹२,७०,१०० वर पोहोचला. काही दिवसांपूर्वीच दिल्ली बाजारात चांदीच्या दरात ₹७,००० ची झेप घेतली होती. या वर्षाच्या सुरुवातीला चांदीने ₹४ लाख प्रति किलोचा टप्पाही पार केला होता. त्यामुळे चांदीत गुंतवणूक करणाऱ्यांचे लक्ष पुन्हा या धातूकडे वळले आहे.
आंतरराष्ट्रीय बाजारातही सोन्या-चांदीच्या दरात मोठी हालचाल सुरू आहे. जागतिक बाजारात स्पॉट गोल्डचा दर ४,७३४ डॉलर प्रति औंसवर व्यवहार करत आहे. तर स्पॉट सिल्व्हर ८१ डॉलर प्रति औंसच्या पुढे गेला आहे. अमेरिकेतील आर्थिक धोरणे, जागतिक तणाव आणि सुरक्षित गुंतवणुकीसाठी वाढती मागणी यामुळे सोन्या-चांदीच्या किमतींना आधार मिळत असल्याचे तज्ज्ञांचे मत आहे.
एमसीएक्स बाजारातही तेजीचे वातावरण कायम आहे. जून २०२६ गोल्ड कॉन्ट्रॅक्ट ₹१,५२,७१५ वर व्यवहार करत आहे. तर जुलै सिल्व्हर कॉन्ट्रॅक्ट ₹२,५५,८२६ पर्यंत पोहोचला आहे. वाढत्या दरांमुळे लग्नसराईतील ग्राहकांचे बजेट कोलमडण्याची शक्यता व्यक्त केली जात आहे. दुसरीकडे, अनेक गुंतवणूकदार अजूनही सोन्यात गुंतवणूक सुरक्षित मानत आहेत.
