सलग अनेक दिवसांच्या तेजीनंतर सोन्या-चांदीच्या दरांना अखेर ब्रेक लागला असून मल्टी कमोडिटी एक्स्चेंज (MCX) वर दोन्ही मौल्यवान धातूंच्या किमतींमध्ये घसरण नोंदवली गेली. अमेरिकेतील महागाईची आकडेवारी अपेक्षेपेक्षा सौम्य आल्याने जागतिक बाजारातील गुंतवणूकदारांचे लक्ष पुन्हा व्याजदरांच्या संभाव्य धोरणाकडे वळले आहे. मात्र, त्याचवेळी पश्चिम आशियातील वाढत्या तणावामुळे कच्च्या तेलाच्या किमती वाढण्याची शक्यता निर्माण झाली असून भविष्यात महागाई पुन्हा डोके वर काढू शकते, अशी भीतीही व्यक्त केली जात आहे. या मिश्र संकेतांमुळे मौल्यवान धातूंमध्ये नफा-वसुलीचे वातावरण दिसून आले.
MCX वर सोन्याच्या वायदा दरात प्रति १० ग्रॅम सुमारे ₹१,४०० हून अधिक घसरण झाली, तर चांदीच्या वायदा दरातही प्रति किलो सुमारे ₹२,००० पेक्षा अधिक घसरण झाली. आंतरराष्ट्रीय बाजारातही स्पॉट गोल्ड आणि सिल्व्हरच्या किमती दबावाखाली राहिल्या. अमेरिकेच्या फेडरल रिझर्व्हकडून व्याजदरांबाबत पुढे काय निर्णय घेतला जाईल, याकडे गुंतवणूकदारांचे लक्ष लागले आहे.
हे ही वाचा:
कुडनकुलम अणुऊर्जा प्रकल्पाची संवेदनशील माहिती डार्क वेबवर?
IDBI बँकेसाठी अब्जावधींची शर्यत; खासगीकरणाला निर्णायक वळण
रशियन तेलावरून भारताला मोठा दिलासा!
वर्गीस पती-पत्नी करत होते धर्मप्रसार, वारकऱ्यांना जाळ्यात ओढण्याचा प्रयत्न
विश्लेषकांच्या मते, सोन्या-चांदीच्या किमतींमध्ये सध्या मोठी अस्थिरता कायम राहू शकते. एका बाजूला सुरक्षित गुंतवणुकीची मागणी सोन्याला आधार देत असली, तरी दुसऱ्या बाजूला वाढते तेलाचे दर, जागतिक भू-राजकीय घडामोडी आणि व्याजदरांबाबतची अनिश्चितता या सर्वांचा परिणाम मौल्यवान धातूंवर होत आहे. त्यामुळे अल्पकालीन गुंतवणूकदारांनी सावध भूमिका घेणे आवश्यक असून, दीर्घकालीन गुंतवणूकदारांनी टप्प्याटप्प्याने गुंतवणूक करण्याचा विचार करावा, असा तज्ज्ञांचा सल्ला आहे.
