मुंबईतील घरांच्या किमती सातत्याने वाढत असताना अंधेरी पश्चिम हा आलिशान घरांच्या बाजारपेठेतील नवा हॉटस्पॉट बनत आहे. या परिसरातील मालमत्तांचा सरासरी मागणीभाव २०२३ च्या पहिल्या तिमाहीत ३३,९५० रुपये प्रति चौरस फूट होता. २०२५ च्या पहिल्या तिमाहीत तो ३६,१०० रुपये, तर २०२६ च्या पहिल्या तिमाहीत ३९,३५० रुपयांवर पोहोचला. जुलै ते सप्टेंबर २०२६ या कालावधीत हा दर सुमारे ४१,९५० रुपये प्रति चौरस फूट नोंदवण्यात आला. म्हणजेच, तीन वर्षांत प्रति चौरस फुटामागे ८,००० रुपयांची वाढ झाली असून, एकूण दरवाढ जवळपास २३.६ टक्के आहे. या तेजीमुळे अंधेरी पश्चिमचे मुंबईच्या प्रीमियम रिअल इस्टेट बाजारातील महत्त्व वाढले आहे.
या दरवाढीचा परिणाम घरखरेदीच्या बजेटवर स्पष्टपणे दिसत आहे. ५०० चौरस फुटांच्या घराची किंमत २०२३ मधील सरासरी दरानुसार सुमारे १ कोटी ६९ लाख ७५ हजार रुपये होती. २०२६ मधील दरानुसार हीच किंमत २ कोटी ९ लाख ७५ हजार रुपयांपर्यंत पोहोचते. म्हणजेच, सुमारे ४० लाख रुपयांची वाढ झाली आहे. त्याचप्रमाणे, १,००० चौरस फुटांच्या घराची किंमत ३ कोटी ३९ लाख ५० हजार रुपयांवरून ४ कोटी १९ लाख ५० हजार रुपयांपर्यंत जाते. हा फरक तब्बल ८० लाख रुपये आहे. हे गणित सरासरी मागणीभावावर आधारित असून, प्रत्यक्ष व्यवहारातील किंमत आणि नोंदणीसह इतर खर्च वेगळे असू शकतात.
हे ही वाचा:
दुखापतीमुळे ईशान किशन दुसऱ्या टी-२० मधून बाहेर
विश्वविक्रमासह मोना अग्रवालला दुसरे सुवर्ण!
भारत-जर्मनी व्यापार ३१० अब्ज डॉलरपर्यंत जाण्याचा पीयूष गोयल यांचा विश्वास
महापौर, अमिताभ, दिलजित दोसांजसह शाळांना बॉम्बची धमकी
अंधेरी पश्चिममधील वाढत्या मागणीमागे मेट्रो, पश्चिम रेल्वे, विमानतळाशी असलेली जवळीक आणि व्यावसायिक सुविधांचा मोठा वाटा आहे. शाळा, रुग्णालये, मॉल्स आणि मनोरंजनाची साधने यांमुळे हा परिसर घरखरेदीदारांसाठी आकर्षक ठरत आहे. त्यातच जुन्या इमारतींच्या पुनर्विकासातून आधुनिक सुविधा असलेल्या नव्या इमारती उभ्या राहत आहेत. प्रशस्त सदनिका, वाहनतळ आणि सुरक्षा व्यवस्थेमुळे उच्च उत्पन्न गटातील ग्राहकांची पसंती वाढत आहे. बांद्रा आणि जुहूसारख्या महागड्या परिसरांच्या तुलनेत अंधेरी पश्चिम हा पर्याय म्हणून पुढे आला असला, तरी येथील वाढते दर घरखरेदी अधिक खर्चिक बनवत आहेत.
मुंबईतील रिअल इस्टेट बाजारातील तेजी विकासक आणि मालमत्ताधारकांसाठी संधी निर्माण करत असली, तरी मध्यमवर्गीयांसाठी घराचे स्वप्न महाग होत आहे. वाढती मालमत्ता किंमत, गृहकर्जाचे हप्ते आणि दैनंदिन खर्च यांचा ताळमेळ साधणे अनेक कुटुंबांसाठी कठीण बनले आहे. अंधेरी पश्चिममध्ये पायाभूत सुविधांचा विकास आणि पुनर्विकासामुळे मालमत्तांचे आकर्षण वाढत असताना परवडणाऱ्या घरांची उपलब्धता हा महत्त्वाचा प्रश्न ठरत आहे. आगामी काळात या परिसराचे आलिशान घरांच्या बाजारपेठेतील स्थान अधिक मजबूत होण्याची शक्यता असली, तरी मुंबईतील सर्वसामान्य नागरिकांना परवडणारी घरे उपलब्ध करून देण्याचे आव्हान कायम राहणार आहे.
