भारतात सप्टेंबर २०२६ मध्ये किरकोळ महागाईचा दर वार्षिक आधारावर वाढून ५.५४ टक्क्यांवर पोहोचला आहे. ऑगस्टमध्ये हा दर ४.८३ टक्के होता. केंद्र सरकारने सोमवारी जाहीर केलेल्या आकडेवारीतून ही माहिती समोर आली आहे. सप्टेंबरमधील महागाईचा दर तात्पुरत्या स्वरूपातील असून ऑगस्टचा दर अंतिम स्वरूपात नोंदवण्यात आला आहे.
सांख्यिकी आणि कार्यक्रम अंमलबजावणी मंत्रालयाने जारी केलेल्या आकडेवारीनुसार, सप्टेंबरमध्ये ग्रामीण भारतातील किरकोळ महागाईचा दर ६.०८ टक्के, तर शहरी भागातील महागाईचा दर ४.८८ टक्के होता. ग्रामीण भागातील महागाई शहरी भागाच्या तुलनेत अधिक असल्याचे या आकडेवारीतून स्पष्ट झाले आहे.
अन्नधान्य महागाईचा दर ७.७४ टक्क्यांवर
सप्टेंबर २०२६ मध्ये अन्नधान्य महागाईचा वार्षिक दर ७.७४ टक्के नोंदवण्यात आला. ग्रामीण भागात हा दर ८.०६ टक्के, तर शहरी भागात ७.१८ टक्के होता. त्यामुळे अन्नपदार्थांच्या किमतीतील वाढीचा ग्रामीण भागातील ग्राहकांना तुलनेने अधिक फटका बसल्याचे दिसून येते.
किमती घसरलेल्या प्रमुख पाच वस्तू :
बटाटा : ११.५० टक्के घट
टोमॅटो : ८.६२ टक्के घट
मोटार कार आणि जीप : ४.५१ टक्के घट
भेंडी : ४.४८ टक्के घट
नारळ : ३.९९ टक्के घट
हे ही वाचा:
श्रीनगरमध्ये दहशतवाद्यांना आश्रय देणाऱ्या गुलाम मोहम्मदचे घर जप्त
काँग्रेस खासदार बिमोल अकोईजाम यांच्याविरोधात लैंगिक छळाचा गुन्हा
एमपीएससी चौकशीसाठी समिती; तुकाराम मुंढेंकडे महत्त्वाची जबाबदारी
किमती वाढलेल्या प्रमुख पाच वस्तू :
कांदा : १०८.०९ टक्के वाढ
चांदीचे दागिने : ८७.८० टक्के वाढ
आले : ६२.८५ टक्के वाढ
लसूण : ५४.६२ टक्के वाढ
लिंबू : ३६.४१ टक्के वाढ
या आकडेवारीनुसार, बटाटा आणि टोमॅटोच्या किमती कमी झाल्या असल्या, तरी कांदा, आले आणि लसूण यांसारख्या दैनंदिन वापरातील वस्तूंच्या किमतींमध्ये मोठी वाढ झाली आहे.
या पाच राज्यांमध्ये सर्वाधिक किरकोळ महागाई
सप्टेंबरमध्ये देशातील सर्वाधिक किरकोळ महागाई नोंदवणाऱ्या पहिल्या पाच राज्यांमध्ये तामिळनाडू, ओडिशा, मध्य प्रदेश, तेलंगणा आणि आंध्र प्रदेश यांचा समावेश होता.
तामिळनाडू : ६.८१ टक्के
ओडिशा : ६.७० टक्के
मध्य प्रदेश : ६.६८ टक्के
तेलंगणा : ६.६४ टक्के
आंध्र प्रदेश : ६.२९ टक्के
