गणेशोत्सवादरम्यान अन्नदानाचा कार्यक्रम सुरू असताना त्याठिकाणी हाडे आणि नॉन-व्हेज खाद्यपदार्थांचा कचरा असलेले पाकीट फेकल्याच्या आरोपावरून हैदराबादमध्ये तणाव निर्माण झाला आहे. मादन्नापेट परिसरातील २ बीएचके पोलीस हाउसिंग सोसायटीजवळ रविवारी, २० सप्टेंबर रोजी दुपारी सुमारे ३ वाजता ही घटना घडल्याचे पोलिसांनी सांगितले. या प्रकरणी पोलिसांनी तीन जणांना चौकशीसाठी ताब्यात घेतले आहे.
पोलिसांनी ताब्यात घेतलेल्या तिघांची नावे मोहम्मद इमरान कुरेशी, अर्शिया बेगम आणि समीना अशी आहेत. हे तिघेही संबंधित हाउसिंग सोसायटीतील रहिवासी असल्याचे चारमिनार झोनचे डीसीपी किरण खरे यांनी सांगितले. या प्रकरणात तपासाच्या आधारे कठोर कायदेशीर कारवाई केली जाईल, असे पोलिसांनी स्पष्ट केले आहे. रविवारी दुपारी परिसरात गणेश विसर्जनाची तयारी सुरू होती. त्याचवेळी अन्नदानाचा कार्यक्रमही आयोजित करण्यात आला होता. या कार्यक्रमासाठी अन्न शिजवले जात असताना किंवा अन्नवाटप सुरू असताना, खाद्यपदार्थांच्या भांड्यांजवळ एक प्लास्टिकचे पाकीट आढळल्याचे वृत्त आहे. या पाकिटात हाडे आणि नॉन-व्हेज खाद्यपदार्थांचा कचरा असल्याचे प्राथमिक माहितीत समोर आले. पोलिसांच्या प्राथमिक माहितीनुसार, संबंधित नॉन-व्हेज साहित्य हाउसिंग सोसायटीमधून खाली फेकण्यात आल्याचा संशय आहे. चारमिनार झोनचे डीसीपी किरण खरे यांनी या साहित्याचे वर्णन “नॉन-व्हेज मटेरियल, बीफसारखे” असे केले आहे.
घटनेची माहिती समोर आल्यानंतर काही हिंदू संघटना आणि भाजप कार्यकर्त्यांनी चंचलगुडा परिसरात आंदोलन केले. गणेशोत्सवाच्या अन्नदान कार्यक्रमाजवळ अशा प्रकारचे साहित्य फेकल्याने धार्मिक भावना दुखावल्याचा आरोप आंदोलकांनी केला. संबंधितांवर तातडीने कठोर कारवाई करण्याची मागणी करण्यात आली. गणेश मंडळाच्या आयोजकांनीही पोलिसांकडे निवेदन देऊन या घटनेची चौकशी आणि संबंधितांवर कारवाई करण्याची मागणी केली आहे.
हे ही वाचा:
“गणवेश नको, सेवा सुधारा!” पीआयएच्या नव्या गणवेशावरून वाद
मागण्या पूर्ण होईपर्यंत होर्मुझची सामुद्रधुनी खुली करणार नाही!
विखे पाटील घराण्याची लेक स्वीडनच्या संसदेत
आशियाई क्रीडा स्पर्धेत भारतीय महिला क्रिकेट संघाची बांगलादेशवर मात
घटनेनंतर पोलिसांनी घटनास्थळी पोहोचून परिस्थिती नियंत्रणात आणली आणि तिघांना ताब्यात घेतले. या तिघांची चौकशी सुरू असून, पाकीट नेमके कोणी फेकले, त्यामागील परिस्थिती काय होती आणि या घटनेमागे कोणताही हेतू होता का, याचा तपास पोलिस करत आहेत. तपासातील निष्कर्षांच्या आधारे पुढील कायदेशीर कारवाई केली जाणार असल्याचे पोलिसांनी सांगितले. दरम्यान, पोलिसांनी परिसरातील परिस्थिती सध्या शांत असल्याचे सांगितले असून, नागरिकांनी अफवा किंवा अपुष्ट माहिती पसरवू नये, असे आवाहन केले आहे. पोलिसांच्या म्हणण्यानुसार, परिस्थिती नियंत्रणात असून वाहतूकही सुरळीत झाली आहे.
