प्रतिष्ठित आयआयटी आणि नामांकित इंजिनिअरिंग कॉलेजमध्ये प्रवेश मिळवून देण्याचे आमिष दाखवत विद्यार्थ्यांच्या पालकांची लाखो रुपयांची फसवणूक करणाऱ्या मोठ्या रॅकेटचा मुंबई पोलिसांनी पर्दाफाश केला आहे. या प्रकरणात पोलिसांनी पुण्यातील दोन बनावट कॉल सेंटरवर छापा टाकून १० जणांना अटक केली आहे. विशेष म्हणजे, अटक करण्यात आलेल्यांमध्ये इंजिनिअर, इंजिनिअरिंगचे विद्यार्थी आणि एमबीए विद्यार्थ्यांचाही समावेश आहे. पोलिसांच्या तपासानुसार हे रॅकेट पुण्यातून चालवले जात होते आणि प्रवेशाच्या हंगामात सोशल मीडियाच्या माध्यमातून विद्यार्थ्यांना आणि त्यांच्या पालकांना हेरले जात होते.
या फसवणुकीचा धक्कादायक प्रकार मुंबईतील पवई परिसरातील एका महिलेच्या तक्रारीनंतर समोर आला. तिच्या मुलाला हैदराबादमधील इंटरनॅशनल इन्स्टिट्यूट ऑफ इन्फॉर्मेशन टेक्नॉलॉजीमध्ये प्रवेश मिळवून देण्याचे आश्वासन देण्यात आले होते. इन्स्टाग्रामवरील एका खात्याच्या माध्यमातून तिच्याशी संपर्क साधण्यात आला आणि प्रवेशासाठी तब्बल १६ लाख ५० हजार रुपये घेण्यात आले. मात्र पैसे दिल्यानंतर प्रवेश झाला नाही. पोलिसांनी बँक खात्यांमधील व्यवहारांचा माग काढत सुमारे १६ लाख रुपये गोठवले आणि न्यायालयाच्या आदेशानंतर ही रक्कम संबंधित महिलेला परत करण्यात आली. या तक्रारीचा तपास करताना पोलिसांना या फसवणुकीमागे मोठे नेटवर्क असल्याचे आढळून आले.
तपासात पुण्यातील विमाननगर-लोहेगाव आणि खराडी परिसरात दोन बनावट कॉल सेंटर सुरू असल्याचे समोर आले. पोलिसांनी १६ ऑगस्ट रोजी या ठिकाणी छापे टाकले. या कारवाईत २२ मोबाईल फोन, २३ सिमकार्ड, लॅपटॉप, हार्ड डिस्क, डेबिट कार्ड आणि इतर साहित्य जप्त करण्यात आले. रॅकेटशी संबंधित सुमारे १ कोटी ३५ लाख रुपयांची मालमत्ताही पोलिसांनी ताब्यात घेतली असून त्यात बीएमडब्ल्यू आणि जॅग्वारसारख्या महागड्या वाहनांचा समावेश आहे. तसेच संशयास्पद बँक खात्यांमधील आणखी २४ लाख रुपये गोठवण्यात आले आहेत.
पोलिसांच्या माहितीनुसार, आरोपी सोशल मीडियावर बनावट जाहिराती देऊन ‘मॅनेजमेंट कोटा’ किंवा ‘एनआरआय कोटा’तून प्रतिष्ठित कॉलेजमध्ये प्रवेश मिळवून देण्याचा दावा करत होते. पालकांचा विश्वास संपादन करण्यासाठी आरोपी स्वतःला कॉलेज प्रशासनाशी संबंधित व्यक्ती असल्याचे भासवत होते. पैसे घेतल्यानंतर प्रवेशाची प्रक्रिया सुरू असल्याचे सांगत वेळ काढला जात असे आणि प्रवेशाची यादी जाहीर होण्यापूर्वी कॉल सेंटर बंद करून मोबाईल आणि सिमकार्ड नष्ट केले जात असल्याचा पोलिसांचा आरोप आहे. या प्रकरणात आतापर्यंत सुमारे ३० मोबाईल क्रमांकांचा माग काढण्यात आला असून मुंबई, नागपूर, उत्तर प्रदेश आणि कर्नाटकमधील किमान सहा समान प्रकरणांशी या रॅकेटचे संबंध असल्याचा संशय आहे. तपासात आणखी किती विद्यार्थी आणि पालकांना या टोळीने लक्ष्य केले, याचा शोध पोलिस घेत आहेत
