हिमाचल प्रदेश पोलिसांनी गांधी कुटुंबाला लक्ष्य करणारी सोशल मीडिया पोस्ट केल्याप्रकरणी भाजप खासदार कंगना रनौत यांच्याविरोधात शिमला येथे एफआयआर दाखल केला आहे. रनौत यांच्या वक्तव्यामुळे प्रक्षोभ निर्माण होऊ शकतो आणि सार्वजनिक शांतता भंग होण्याची शक्यता असल्याचा आरोप तक्रारीत करण्यात आला आहे.
शिमला येथील रहिवासी आणि निवृत्त कॅप्टन अतुल शर्मा यांनी दाखल केलेल्या तक्रारीच्या आधारे शुक्रवार, १३ नोव्हेंबर रोजी हा गुन्हा नोंदवण्यात आला.
शर्मा यांनी आरोप केला आहे की, रनौत यांनी १० नोव्हेंबर रोजी त्यांच्या अधिकृत सोशल मीडिया खात्यावरून शेअर केलेल्या पोस्टमध्ये माजी पंतप्रधान इंदिरा गांधी आणि त्यांचे पुत्र संजय गांधी व राजीव गांधी यांच्या मृत्यूबाबत “अत्यंत प्रक्षोभक सूचक विधाने” केली होती.
भारतीय न्याय संहितेच्या (BNS) कलम १९६(१)(ब), ३५३(२) आणि ३५६(२) अंतर्गत एफआयआर दाखल करण्यात आला आहे. शिमल्याचे पोलीस अधीक्षक गौरव सिंह यांनी गुन्हा नोंदवण्यात आल्याची पुष्टी केली असून, या प्रकरणाचा तपास करण्यात येणार असल्याचे सांगितले.
हे ही वाचा:
डॉ. थंगजाम धाबाली सिंग यांना वन इंडिया पुरस्कार
हलाल मांस न विकण्यावरून लंडनमध्ये भारतीय रेस्टॉरंट मालकाला धमक्या
पंतप्रधान मोदींचा राहुल गांधींना असाही धक्का
छायाचित्रांतून उलगडणार ताडोबाचे जंगलविश्व!
तक्रारदाराने काँग्रेस नेत्या सोनिया गांधी यांच्याबाबत पोस्टमध्ये करण्यात आलेल्या उल्लेखावरही आक्षेप घेतला आहे. या पोस्टमध्ये सोनिया गांधी यांना कथितरीत्या “रहस्यमय परदेशी नागरिक” असे संबोधण्यात आले होते.
शर्मा यांनी दावा केला की, या पोस्टमध्ये असा सूचक उल्लेख करण्यात आला होता की, गांधी कुटुंबातील सदस्यांची एकापाठोपाठ हत्या होण्यापूर्वी सोनिया गांधी परदेशातील एका कॅफेमध्ये पोहोचल्या होत्या आणि अखेरीस त्या ‘सरकारच्या प्रमुखपदी’ पोहोचल्या. या कथित उल्लेखासोबत “किती सोयीस्कर” अशी टिप्पणीही करण्यात आली होती.
या पोस्टमध्ये संजय गांधी यांच्या मृत्यूनंतर मनेका यांनी गांधी कुटुंबाचे निवासस्थान सोडल्याचाही उल्लेख करण्यात आला होता.
शर्मा यांनी असा युक्तिवाद केला की, ही मांडणी केवळ राजकीय टीकेच्या मर्यादेत राहिलेली नाही, तर त्यामुळे जनतेमध्ये वैमनस्य निर्माण होऊ शकते, सामाजिक सलोखा बिघडू शकतो आणि सार्वजनिक शांततेला धोका निर्माण होऊ शकतो.
तसेच, ही पोस्ट दिशाभूल करणारी माहिती प्रसारित करण्यासारखी असून, त्यामुळे लोकांमध्ये भीती किंवा घबराट निर्माण होऊ शकते आणि विविध समूहांमध्ये शत्रुत्व वाढू शकते, असा आरोपही त्यांनी केला.
पोलीस महासंचालकांना उद्देशून केलेली तक्रार शर्मा यांनी गुरुवारी सायंकाळी ७ वाजून ५१ मिनिटांनी ई-मेलद्वारे पाठवली होती. रनौत यांच्या पोस्टविरोधात तातडीने एफआयआर दाखल करावा आणि कालमर्यादेत सायबर-फॉरेन्सिक तपास करण्यात यावा, अशी मागणी त्यांनी केली होती.
पोलिसांनी सांगितले की, या प्रकरणाचा तपास सुरू आहे.
दरम्यान, रनौत यांच्या या टिप्पण्या सोशल मीडियावर सुमारे १९८१ मधील एक जुना कौटुंबिक व्हिडिओ पुन्हा समोर आल्यानंतर करण्यात आल्या होत्या.
