मणिपूरमध्ये हिंसाचाराच्या नव्या घटनांमध्ये किमान चार जणांचा मृत्यू झाला असून, अनेक जण जखमी झाले आहेत. या घटनांनंतर संतप्त नागरिकांनी आंदोलन सुरू केले. आंदोलकांनी मुख्यमंत्र्यांच्या निवासस्थानाबाहेर दोन मृतदेह ठेवले. परिस्थिती नियंत्रणात आणण्यासाठी पोलिसांना अश्रुधूर आणि लाठीचार्जचा वापर करावा लागला. त्यामुळे इम्फाळमधील जनजीवन विस्कळीत झाले.
पहिली घटना मैतेई आणि पांगल मुस्लिमांची वस्ती असलेल्या परिसरात संगीत कार्यक्रमादरम्यान घडली. येथे दगडफेक आणि गोळीबार झाल्याचे वृत्त असून, त्यात अनेक जण जखमी झाले. गोळी लागल्याने एका २४ वर्षीय तरुणाचा मृत्यू झाला.
दुसरी घटना इम्फाळ पूर्व जिल्ह्यातील खामेनलोक परिसरात घडली. इम्फाळ पूर्व आणि कुकीबहुल कांगपोकपी जिल्ह्याच्या सीमेजवळ लाकूडफाटा गोळा करण्यासाठी गेलेल्या तीन गावकऱ्यांची संशयित आदिवासी हल्लेखोरांनी गोळ्या घालून हत्या केल्याचा आरोप आहे. या हल्ल्यात अन्य तिघे जखमी झाले. मृतांची ओळख अरुबाम रोनिल (३५), लैरेनलाकपाम इनाओबी (४४) आणि क्षेत्रमायुम सुशील (३२) अशी झाली आहे.
हे ही वाचा:
‘त्या’ पद्धतीने रिजिम चेंजवर आमचा विश्वास नाही!
भारत-अमेरिका व्यापार करार अंतिम टप्प्यात
टायगर गोळीबारप्रकरणी तिघांना रेल्वेत पकडले
‘लष्कर’ संस्थापक सदस्य मोहम्मद सरवर पायऱ्यांवरून पडून गतप्राण
या घटनेनंतर संतप्त नागरिकांनी मृतदेह मुख्यमंत्र्यांच्या उच्च-सुरक्षा निवासस्थानाबाहेर आणले. पोलिसांनी बळाचा वापर करून मृतदेह तेथून हटवले. मुख्यमंत्री युमनाम खेमचंद सिंह यांनी रुग्णालयात जाऊन जखमींची भेट घेतली. स्थानिक आमदार थोखचोम लोकेश्वर सिंह यांनी घटनास्थळाजवळील ‘सिनाई’ सस्पेन्शन ऑफ ऑपरेशन्स (SoO) छावणी हटवण्याची मागणी केली. मे २०२३ पासून सुरू असलेल्या मैतेई-कुकी संघर्षाच्या पार्श्वभूमीवर या घटनांमुळे राज्यातील तणाव पुन्हा वाढण्याची शक्यता आहे.
