मुंबईतून बालकांच्या ऑनलाइन लैंगिक शोषणाशी संबंधित गंभीर प्रकार उघडकीस आला आहे. मालाड पश्चिम परिसरात राहणाऱ्या ४९ वर्षीय व्यक्तीच्या मोबाईलमध्ये बाल लैंगिक शोषणाशी संबंधित २० हजारांहून अधिक फोटो आणि व्हिडिओ आढळले आहेत. महाराष्ट्र सायबर पोलिसांनी या प्रकरणी सैफुद्दीन जमीरुद्दीन मलिक याला अटक केली आहे. आरोपी ही सामग्री डाउनलोड करून आपल्या मोबाईलमध्ये साठवत असल्याचा संशय आहे.
महाराष्ट्र सायबर विभागाच्या विशेष पथकांनी ऑनलाइन प्लॅटफॉर्मवर सुरू असलेल्या देखरेखीदरम्यान मिळालेल्या गोपनीय माहितीच्या आधारे ही कारवाई केली. सायबर विभागाच्या तीन विशेष युनिट्सनी तांत्रिक विश्लेषण आणि सायबर इंटेलिजन्सच्या मदतीने संशयिताचा शोध घेतला. त्यानंतर मालाड पश्चिम येथून सैफुद्दीनला ताब्यात घेण्यात आले.
या प्रकरणी महाराष्ट्र सायबरच्या नोडल सायबर पोलीस ठाण्यात भारतीय न्याय संहिता (BNS) कलम २९४, पॉक्सो कायदा कलम १५ आणि माहिती तंत्रज्ञान कायदा कलम ६७(ब) अंतर्गत गुन्हा दाखल करण्यात आला आहे. आरोपीच्या मोबाईलची तपासणी केली असता २० हजारांहून अधिक आक्षेपार्ह फोटो आणि व्हिडिओ आढळल्याचे पोलिसांनी सांगितले.
हे ही वाचा:
गुरुग्राममधून वैध पासपोर्ट नसलेल्या १४ बांगलादेशींना अटक
दिवाळीच्या मुहूर्तावर ‘रामायण’ची ५६.१५ कोटींची कमाई
चीनमध्ये १० कोटी नागरिक कर्जफेडीच्या संकटात
दिवाळीच्या रात्री आतषबाजी, दुसऱ्या दिवशी मुंबईत प्रदूषणाची कोंडी
आरोपीच्या मोबाईलमधील डिजिटल सामग्रीची सध्या सविस्तर फॉरेन्सिक तपासणी केली जात आहे. ही सामग्री नेमकी कुठून डाउनलोड करण्यात आली, ती कोणत्या माध्यमातून साठवण्यात आली आणि आरोपीने ती इतरांना पाठवली किंवा ऑनलाइन प्लॅटफॉर्मवर प्रसारित केली का, याचा तपास सुरू आहे. या प्रकरणात आणखी कोणाचा सहभाग आहे का, याचाही शोध घेतला जात आहे.
