जम्मू-काश्मीरमधील किश्तवाड जिल्ह्यात गस्तीदरम्यान बेपत्ता झालेले जम्मू-काश्मीर पोलिसांचे दोन विशेष पोलीस अधिकारी (SPO) मृतावस्थेत आढळले आहेत. रशपाल कुमार (वय ४०) आणि बाबी चंद (वय ५४) अशी मृत अधिकाऱ्यांची नावे आहेत. किश्तवाडच्या दुर्गम डाचन-मरवाह परिसरात बुधवारी (११ नोव्हेंबर) गस्त घालत असताना ते बेपत्ता झाले होते. गुरुवारी (१२ नोव्हेंबर) सकाळी शोधमोहीमेदरम्यान त्यांचे मृतदेह धेरना टॉप परिसरात आढळले. या दोघांची दहशतवाद्यांनी घात लावून हत्या केल्याचा संशय व्यक्त केला जात आहे.
माहितीनुसार, रशपाल कुमार आणि बाबी चंद हे जम्मू-काश्मीर पोलिसांच्या विशेष अभियान गटाशी (SOG) संबंधित होते. बुधवारी ते लष्कराच्या १७ राष्ट्रीय रायफल्सच्या पथकातील जवानांना ड्युटीवरून मुक्त करण्यासाठी धेरना पोस्टच्या दिशेने जात होते. त्याचवेळी परिसरात गोळीबाराचे आवाज ऐकू आले होते. त्यानंतर दोन्ही अधिकाऱ्यांचे मोबाईल फोन सुरुवातीला सुरू होते; मात्र काही वेळाने ते बंद झाले. दोघेही निर्धारित ठिकाणी न पोहोचल्याने सुरक्षा यंत्रणांनी शोधमोहीम सुरू केली होती. अखेर गुरुवारी सकाळी त्यांचे मृतदेह आढळले. यातील एका अधिकाऱ्याच्या डोक्यावर, तर दुसऱ्याच्या पाठीवर गोळी लागल्याच्या जखमा आढळल्या आहेत.
हे ही वाचा:
कुलगाम हल्ल्यापूर्वीच सीआरपीएफ जवानांना मिळाला होता इशारा?
लाभार्थी हिंदू, ताबा बांगलादेशींकडे? म्हाडाच्या ११० घरांवरून वाद
ईशान्य भारतातील कर्तृत्ववानांचा होणार गौरव
मूडीजकडून भारताच्या आर्थिक विकासदराचा अंदाज वाढवला
दोन्ही अधिकाऱ्यांकडे असलेल्या INSAS आणि .303 या सर्व्हिस रायफल्स घटनास्थळावरून गायब आहेत. दहशतवाद्यांनी हत्या केल्यानंतर या शस्त्रांसह घटनास्थळावरून पळ काढल्याचा अंदाज आहे. या हत्येमागे कोणाचा हात आहे, याचा तपास सुरक्षा यंत्रणा करत आहेत. हल्लेखोरांचा शोध घेण्यासाठी पोलिस आणि सुरक्षा दलांनी परिसरातील शोधमोहीम अधिक तीव्र केली आहे.
