रशियाच्या सायबेरियातील इर्कुत्स्क भागात एका २८ वर्षीय संशोधकाच्या मृत्यूनंतर संभाव्य प्लेग संसर्गाची भीती निर्माण झाली आहे. या घटनेनंतर जवळपास २०० जणांना वैद्यकीय देखरेखीखाली ठेवण्यात आले असून, काही रुग्णालयांमध्ये क्वारंटाइनसदृश उपाययोजना करण्यात आल्या आहेत. मात्र, रशियन आरोग्य अधिकाऱ्यांनी प्लेगच्या संसर्गाची अद्याप अधिकृत पुष्टी केलेली नाही.
मृत संशोधकाची ओळख दार्या शिपिलोव्हा अशी करण्यात आली आहे. ती इर्कुत्स्क अँटी-प्लेग रिसर्च इन्स्टिट्यूटमध्ये कार्यरत होती. २९ सप्टेंबर रोजी तिला गंभीर स्वरूपाच्या न्यूमोनियाच्या लक्षणांनंतर शेलेखोव्ह येथील रुग्णालयात दाखल करण्यात आले होते. तिची प्रकृती गंभीर झाल्यानंतर तिला व्हेंटिलेटरवर ठेवण्यात आले; मात्र दोन दिवसांनी तिचा मृत्यू झाला.
या प्रकरणात प्रयोगशाळेतील संभाव्य संसर्गाचा संशय व्यक्त केला जात आहे. काही वृत्तांनुसार, शिपिलोव्हा यांनी वैद्यकीय कर्मचाऱ्यांना प्रयोगशाळेत नमुने गोळा करताना जिवंत बॅक्टेरिया असलेली टेस्ट ट्यूब चुकून फुटल्याचे सांगितले होते. मात्र, या दाव्याला रशियन अधिकाऱ्यांनी अधिकृतपणे दुजोरा दिलेला नाही. शिपिलोव्हा यांच्या संपर्कात आलेल्या जवळपास २०० जणांची ओळख पटवण्यात आल्याचे वृत्त आहे. त्यापैकी अनेकांना रुग्णालयात निरीक्षणाखाली ठेवण्यात आले आहे. दरम्यान, इर्कुत्स्कचे गव्हर्नर इगोर कोब्झेव यांनी संपर्कात आलेल्या व्यक्तींमध्ये सध्या आजाराची लक्षणे आढळलेली नसून, त्यांचे प्रयोगशाळेतील चाचणी अहवाल नकारात्मक असल्याचे सांगितले आहे. त्यामुळे व्यापक संसर्गाची कोणतीही पुष्टी झालेली नसल्याचे अधिकाऱ्यांचे म्हणणे आहे.
हे ही वाचा:
भारतीय सैन्य ठरले संकटमोचक; व्हिएतनामी नागरिकाची सुखरूप सुटका
भारत संकटात असताना रशिया पाठीशी!
इस्रायलला जाणाऱ्या फ्लाइटसाठीच फ्लायदुबईची निवड!
फ्रान्समध्ये शिक्षण व्यवस्थेविरोधात विद्यार्थ्यांचा एल्गार
या प्रकरणातील सर्वात महत्त्वाचा प्रश्न म्हणजे शिपिलोव्हा यांचा मृत्यू नेमका प्लेगमुळे झाला का, हा आहे. शेजारील बुर्यातिया प्रदेशाचे प्रमुख अलेक्सी त्सिदेनोव्ह यांनी महिला प्लेगमुळे मृत्यू पावल्याचे सांगितले होते. मात्र, रशियाची ग्राहक सुरक्षा आणि आरोग्य निरीक्षण संस्था रोस्पोट्रेब्नादझोरने तिच्या आजाराचे वर्णन ‘अज्ञात कारणाचा न्यूमोनिया’ असे केले आहे. संस्थेने केलेल्या तपासणीत तिच्या व्यावसायिक कामाशी संबंधित सूक्ष्मजीव आढळले नसल्याचेही सांगितले आहे.
