भारत युरोपियन युनियन आणि युरोपसोबतचे आपले संबंध अधिक दृढ करत असताना, पंतप्रधान नरेंद्र मोदी यांनी गुरुवारी (३ सप्टेंबर) बेल्जियमचे पंतप्रधान बार्ट डी वेव्हर यांची भेट घेतली. या दोन्ही देशांमधील संबंध आता पारंपरिक व्यापाराच्या चौकटीतून बाहेर पडून संरक्षण, स्वच्छ ऊर्जा, सेमीकंडक्टर आणि महत्त्वपूर्ण खनिजांसारख्या धोरणात्मक क्षेत्रांपर्यंत विस्तारत असल्याचे पंतप्रधान मोदी यांनी म्हटले आहे. वेव्हर यांच्यासोबत झालेल्या द्विपक्षीय चर्चेनंतर मोदी यांनी दोन्ही देशांमधील वाढत्या सहकार्यावर प्रकाश टाकला.
पंतप्रधान मोदी यांनी भारत-बेल्जियम सहकार्याचा विस्तार स्पष्ट करताना आधुनिक संरक्षण उपकरणांचा विशेष उल्लेख केला. भारताच्या स्वदेशी ‘झोरावर’ हलक्या रणगाड्याच्या विकासात दोन्ही देशांमधील सहकार्य महत्त्वाचे असल्याचे त्यांनी सांगितले. तसेच, आंध्र प्रदेशातील काकीनाडा येथे जगातील सर्वात मोठ्या ग्रीन अमोनिया प्रकल्पांपैकी एक विकसित करण्यासाठी दोन्ही देश एकत्र काम करत असल्याचे पंतप्रधान मोदी यांनी नमूद केले.
भारत आणि बेल्जियमने संरक्षण आणि सुरक्षा सहकार्य अधिक मजबूत करण्यावरही सहमती दर्शवली आहे. दोन्ही देशांमध्ये लष्करी देवाणघेवाण आणि प्रशिक्षण सहकार्य वाढवले जाणार आहे. संरक्षण उद्योगांमधील करारांमुळे संरक्षण क्षेत्रात संयुक्त विकास आणि संयुक्त उत्पादनाच्या नव्या संधी निर्माण होतील, असे मोदी यांनी सांगितले. दोन्ही देशांनी पुढील पाच वर्षांत द्विपक्षीय व्यापार दुप्पट करण्याचे उद्दिष्ट ठेवले आहे. बेल्जियममधील कंपन्यांसाठी भारतात ‘इन्व्हेस्टमेंट फास्ट-ट्रॅक मेकॅनिझम’ सुरू करण्यात आल्याची माहिती मोदी यांनी दिली.
महत्त्वपूर्ण खनिजांच्या प्रक्रिया आणि पुनर्वापर क्षेत्रात सहकार्य वाढवण्यावर दोन्ही देशांनी भर दिला आहे. सेमीकंडक्टर क्षेत्रात बेल्जियमच्या तंत्रज्ञान कौशल्याचा आणि भारताच्या मोठ्या उत्पादन व बाजारपेठ क्षमतेचा एकत्रित फायदा घेण्याची योजना आहे.
हे ही वाचा:
यासिन मलिकचे सरला भट हत्या प्रकरणाला आव्हान नाही!
कराची अंधारात! १६-२४ तासांच्या वीजकपातीने नागरिक हैराण
हवाई दलाच्या स्वदेशी शस्त्रसामर्थ्यात ‘खगांतक-243’ची भर
भारत-इराण जवळीकतेने अमेरिकेला मुरडा
भारत आणि बेल्जियमचे संबंध ऐतिहासिकदृष्ट्या मजबूत असल्याचे सांगताना मोदी यांनी पहिल्या महायुद्धातील भारतीय सैनिकांच्या योगदानाची आठवण करून दिली. बेल्जियममध्ये लढलेल्या हजारो भारतीय सैनिकांचे शौर्य आणि बलिदान हा दोन्ही देशांच्या सामायिक इतिहासाचा महत्त्वाचा भाग असल्याचे त्यांनी म्हटले. लोकशाही मूल्ये, बाजारपेठाधारित अर्थव्यवस्था आणि दोन्ही देशांमधील मजबूत जनसंपर्क यामुळे भारत आणि बेल्जियम हे नैसर्गिक भागीदार असल्याचे मोदी यांनी सांगितले.
