उत्तर आफ्रिकेतील मोरोक्कोच्या सीमेलगत असलेल्या स्पेनच्या स्यूटा या स्वायत्त शहरात एका दिवसात सुमारे ३,००० स्थलांतरितांनी समुद्रमार्गे प्रवेश केल्याने मोठी खळबळ उडाली आहे. अचानक मोठ्या संख्येने स्थलांतरित सीमेत दाखल झाल्याने स्थानिक पोलिसांवरील ताण प्रचंड वाढला असून स्यूटामधील अधिकाऱ्यांनी स्पेन सरकारकडे तातडीने आणीबाणी जाहीर करण्याची मागणी केली आहे.
स्पेनच्या अधिकाऱ्यांच्या माहितीनुसार, स्थलांतरितांनी पोहत, लहान बोटींचा वापर करत किंवा तरंगत्या साधनांच्या मदतीने स्यूटा किनाऱ्यावर प्रवेश केला. एवढ्या मोठ्या संख्येने लोक एकाचवेळी आल्यामुळे सुरक्षा यंत्रणांना परिस्थिती नियंत्रणात आणण्यासाठी मोठी कसरत करावी लागली. अनेकांना ताब्यात घेण्यात आले असून त्यांच्या ओळखीची आणि नागरिकत्वाची पडताळणी सुरू आहे.
स्थानिक प्रशासनाने सांगितले की, स्यूटामधील निवारा केंद्रांची क्षमता जवळपास संपली आहे. अन्न, वैद्यकीय सेवा आणि तात्पुरत्या निवाऱ्यांवर मोठा ताण निर्माण झाला असून केंद्र सरकारने अतिरिक्त सुरक्षा दल आणि आर्थिक मदत तातडीने उपलब्ध करून द्यावी, अशी मागणी करण्यात आली आहे.
स्यूटा हे उत्तर आफ्रिकेतील स्पेनचे स्वायत्त शहर असून त्याची सीमा थेट मोरोक्कोला लागून आहे. आफ्रिकेतून युरोपमध्ये प्रवेश करण्याचा प्रयत्न करणाऱ्या स्थलांतरितांसाठी हा मार्ग महत्त्वाचा मानला जातो. त्यामुळे या भागात यापूर्वीही मोठ्या प्रमाणावर घुसखोरीच्या घटना घडल्या आहेत.
काही अधिकाऱ्यांच्या मते, स्पेनच्या सर्वोच्च न्यायालयाच्या अलीकडील निर्णयानंतर स्यूटामध्ये स्थलांतरितांची संख्या अचानक वाढली आहे. या निर्णयानुसार, समुद्रमार्गे स्यूटा किंवा मेलिला येथे पोहोचणाऱ्या स्थलांतरितांना तत्काळ परत पाठवता येणार नाही. त्यामुळे अधिकाधिक लोकांनी हा धोकादायक मार्ग स्वीकारल्याची शक्यता व्यक्त केली जात आहे. गार्डिया सिव्हिलच्या प्रवक्त्याने सांगितले की, “सुरुवातीला स्थलांतरितांची संख्या हळूहळू वाढत होती, मात्र आता त्यात अचानक मोठी वाढ झाली आहे.”
दरम्यान, स्पेन सरकारच्या सुमारे ५ लाख अनोंदणीकृत स्थलांतरितांना नियमित दर्जा देण्याच्या योजनेवरूनही राजकीय वाद निर्माण झाला आहे. विरोधकांच्या मते, या धोरणामुळे बेकायदा स्थलांतराला प्रोत्साहन मिळत असल्याचा संदेश जात आहे. या पार्श्वभूमीवर विरोधी पक्षनेते अल्बर्टो नुनेझ फेइजु यांनी स्यूटातील परिस्थितीला राष्ट्रीय सुरक्षेचे संकट संबोधत सरकारवर टीका केली.
हे ही वाचा:
पोलिसांना दगड, फुलदाण्या, चपलांनी मारले! नातेवाईकांनी सांगितली विदारक कहाणी
भिवंडीत चार मजली इमरात कोसळून ९ जणांचा मृत्यू
पाकिस्तानमधील ब्रॉड पीकवर हिमस्खलन; १० गिर्यारोहक बेपत्ता
पंतप्रधान मोदींविरोधात आक्षेपार्ह वक्तव्य; तरुणीविरोधात एफआयआर
केंद्र सरकारने परिस्थितीवर बारकाईने लक्ष ठेवले असून मोरोक्को प्रशासनाशी समन्वय साधत सीमावर्ती सुरक्षा अधिक मजबूत करण्यासाठी पावले उचलली जात आहेत. स्थलांतरित हक्क कार्यकर्त्यांच्या मते, मोरोक्कोच्या सीमावर्ती भागात अजूनही मोठ्या संख्येने लोक स्यूटात प्रवेश करण्याच्या प्रतीक्षेत आहेत. त्यामुळे युरोपमधील बेकायदा स्थलांतराचा प्रश्न पुन्हा ऐरणीवर आला असून, परिस्थिती नियंत्रणात आणणे हे स्पेन सरकारपुढील मोठे आव्हान बनले आहे.
