इराणच्या महिला फुटबॉल संघाने एएफसी महिला आशियाई कप २०२६ मधील दक्षिण कोरियाविरुद्धच्या गट सामन्यापूर्वी राष्ट्रगीत गाण्यास नकार दिला. मध्यपूर्वेतील परिस्थिती युद्धामध्ये परिवर्तित झाल्यानंतर ही घटना घडली आहे. अमेरिका आणि इस्रायलच्या तीव्र बॉम्बहल्ल्यांनंतर इराणने प्रत्युत्तरादाखल इस्रायल आणि शेजारील गल्फ देशांवर हल्ले केले आहेत.
तथापि, संघाने सामना खेळला आणि सोमवारी रात्री गोल्ड कोस्ट स्टेडियमवर दक्षिण कोरियाकडून ०-३ असा पराभव पत्करावा लागला. देशातील तणावपूर्ण परिस्थिती असूनही इराणने धैर्याने लढत दिली. स्टेडियममध्ये काही समर्थक शाहकालीन ध्वज फडकावताना दिसले, ज्यावर सोनेरी सिंह आणि सूर्याचे चिन्ह होते.
इराणचा पहिला अधिकृत ध्वज १९०७ मध्ये स्वीकारण्यात आला होता, ज्यावर सिंह आणि सूर्याचे चिन्ह होते. १९७९ च्या इस्लामिक क्रांतीनंतर तो हिरवा-पांढरा-लाल या रंगांच्या ध्वजाने बदलण्यात आला.
हे ही वाचा:
चीन पुन्हा नापास…आधी पाकिस्तानात आता इराणमध्ये
थंडाई म्हणजे केवळ चविष्ट पेय नाही तर… ‘हे’ आरोग्यदायी फायदे माहिती आहेत का?
“मोदीजी मला परवानगी द्या, मी इराणसाठी लढायला जाईन”
सोने-चांदीच्या दरात जबरदस्त उसळी
वरिष्ठ क्रीडा पत्रकार ट्रेसी होम्स यांच्या दाव्यानुसार, देश सोडण्यापूर्वी खेळाडूंना राष्ट्रगीत गाण्याच्या सूचना देण्यात आल्या होत्या आणि शासनाची नाचक्की करू नये असे सांगण्यात आले होते. तरीही त्यांनी राष्ट्रगीत गायले नाही.
इराणच्या इस्लामिक रिपब्लिक शासनावर महिलांच्या अधिकारांवर निर्बंध लादल्याबद्दल दीर्घकाळ टीका होत आहे. प्रशिक्षक आणि खेळाडूंनी इराणमधील परिस्थितीबाबत कोणतेही प्रश्न घेण्यास नकार दिला.
सामन्यापूर्वी स्पर्धेबाबत बोलताना प्रशिक्षक मर्झीये जाफरी यांनी एएफपीला सांगितले: “२०२२ मध्ये भारतात गट थोडा सोपा होता. २०२६ मध्ये आम्ही अधिक अनुभवासह प्रवेश करत आहोत, पण गट अधिक कठीण आहे. तरीही या सामन्यांमधून आम्हाला इराणी महिलांची क्षमता दाखवायची आहे.”
दरम्यान, सुरू असलेल्या संकटामुळे जून-जुलैमध्ये अमेरिका, कॅनडा आणि मेक्सिको येथे संयुक्तपणे होणाऱ्या फिफा विश्वचषक फुटबॉल स्पर्धेत इराणच्या सहभागाबाबत प्रश्नचिन्ह निर्माण झाले आहे. इराण फुटबॉल महासंघाचे अध्यक्ष मेहदी ताज यांनी वर्झेश ३ या क्रीडा संकेतस्थळाला सांगितले: “या हल्ल्यानंतर आम्ही विश्वचषकाकडे आशेने पाहू शकतो, अशी अपेक्षा ठेवणे योग्य नाही.”
