दहशतवादी संघटना जैश-ए-मोहम्मदचा प्रमुख आणि भारताचा शत्रू मौलाना मसूद अझहरच्या नातेवाईकाची गोळ्या घालून हत्या करण्यात आली आहे. कारी एजाज आबिद हा संघटनेद्वारे दहशतवाद्यांची भरती करायचा त्याची अज्ञात हल्लेखोरांनी हत्या केली आहे. या हल्ल्यात त्याचा साथीदार कारी शाहिदही गंभीर जखमी झाला. पाकिस्तानच्या खैबर पख्तूनख्वा प्रांतातील पेशावरमधील पिस्तखारा भागात एका मशिदीतून बाहेर पडत असताना अज्ञात बंदूकधाऱ्यांनी कारी एजाज आबिद याच्यावर गोळीबार केला. या हल्ल्यात त्याचा जवळचा सहकारीही गंभीर जखमी झाला.
पोलिसांनी दिलेल्या माहितीनुसार, एजाज आबिद हा अहले सुन्नत वाल जमात नावाच्या संघटनेचा महत्त्वाचा सदस्य होता. तो खात्म-ए-नबुवत सारख्या आंतरराष्ट्रीय संघटनेचा प्रांतीय नेता देखील होता. तसेच कारी एजाज आबिद हा मौलाना मसूद अझहर याच्याशी संबंधित होता. दोघांनीही अनेक वेळा एकत्र काम केल्याची माहिती आहे. मिळालेल्या माहितीनुसार, एजाज त्याच्या संघटनेच्या माध्यमातून तरुणांना आमिष दाखवून त्यांना जैश-ए-मोहम्मदसाठी दहशतवादी बनवत असे.
मसूद अझहरची योजना अशी होती की त्याच्या संघटनेत भरती थेट न करता इतर संघटनांद्वारे करावी, जेणेकरून नवीन दहशतवाद्यांची संपूर्ण माहिती मिळू शकेल आणि ते संघटनेसाठी किती फायदेशीर ठरतील हे कळू शकेल. यासाठी कारी एजाज प्रथम तरुणांना त्यांच्या संघटनेच्या बैठकींमध्ये बोलावत असे. मग तो हळूहळू त्यांचे ब्रेनवॉश करून त्यांना धोकादायक दहशतवादी बनवत असे. यानंतर, त्यांना शस्त्रे आणि स्फोटकांचे प्रशिक्षण देण्यासाठी जैश-ए-मोहम्मदच्या छावण्यांमध्ये पाठवण्यात आले.
हेही वाचा..
संयुक्त अरब अमिरातच्या उपपंतप्रधानांच्या भारत दौऱ्यातून काय साध्य होणार ?
कुणाल कामरा यांच्या याचिकेवर काय म्हणाले न्यायालय
संघप्रमुख मोहन भागवत लखनऊमध्ये दाखल
ट्रंप यांनी इराणसोबत थेट चर्चेची केली घोषणा
या प्रकरणात अद्याप हल्लेखोरांची ओळख पटलेली नाही आणि कोणालाही अटकही झालेली नाही. या वर्षी पाकिस्तानमध्ये दहशतवादी संघटनांशी संबंधित सुमारे एक डझन लोकांची अशाच पद्धतीने हत्या करण्यात आली आहे. या प्रकरणांमध्ये अज्ञात हल्लेखोरांना पकडता आलेले नाही.
