हॉर्मुझच्या सामुद्रधुनीतून कच्च्या तेलाची वाहतूक करणाऱ्या कुवेतच्या ध्वजाखालील ‘एमटी काझिमाह-३’ या तेल टँकरवर प्रोजेक्टाईलद्वारे हल्ला झाल्याची धक्कादायक घटना समोर आली आहे. या हल्ल्यानंतर टँकरवरील पाच भारतीय नागरिकांच्या सुरक्षेचा प्रश्न निर्माण झाला होता. मात्र, ओमानमधील भारतीय दूतावासाने तातडीने हालचाली करत ओमानी प्रशासनाच्या मदतीने या पाचही भारतीयांची सुखरूप सुटका केली. सर्व भारतीय नागरिकांना सुरक्षितपणे किनाऱ्यावर हलवण्यात आले असून, या बचावकार्यात सहकार्य केल्याबद्दल भारतीय दूतावासाने ओमानी अधिकाऱ्यांचे आभार मानले आहेत.
हे ही वाचा:
ज्ञानेश कुमार यांच्याविरोधातील आंदोलनप्रकरणी पोलिसांची कारवाई
पंतप्रधान रोजगार निर्मिती कार्यक्रमाला २०३०-३१ पर्यंत मुदतवाढीचा प्रस्ताव
‘त्या’ ओमानी वैमानिकाच्या सोशल मीडियात अल कायदाच्या जवाहिरीचा फोटो
‘एमटी काझिमाह-३’ हा कुवेतचा ध्वज असलेला कच्च्या तेलाचा टँकर असून तो टोगोमधील लोमे बंदराच्या दिशेने जात होता. हॉर्मुझच्या सामुद्रधुनीतून प्रवास सुरू असतानाच या जहाजावर प्रोजेक्टाईलने हल्ला करण्यात आला. घटनेची माहिती मिळताच भारतीय दूतावासाने बचावकार्याचा समन्वय साधला. ओमानी अधिकाऱ्यांच्या मदतीने टँकरवरील पाच भारतीयांना सुरक्षितपणे किनाऱ्यावर आणण्यात आले. या घटनेमुळे हॉर्मुझच्या सामुद्रधुनीतून होणाऱ्या व्यापारी जहाजांच्या वाहतुकीसमोरील सुरक्षेचा प्रश्न पुन्हा एकदा ऐरणीवर आला आहे.
हॉर्मुझची सामुद्रधुनी ही जगातील अत्यंत महत्त्वाची ऊर्जा वाहतूक मार्गांपैकी एक असल्याने या परिसरातील कोणतीही सुरक्षा घटना आंतरराष्ट्रीय व्यापार आणि तेल पुरवठ्यासाठी महत्त्वाची ठरते. दरम्यान, पर्शियन आखात आणि आसपासच्या सागरी क्षेत्रात मोठ्या संख्येने भारतीय खलाशी कार्यरत आहेत. भारतीय परराष्ट्र मंत्रालयाने यापूर्वीच या भागातील भारतीय नागरिकांच्या सुरक्षेवर बारकाईने लक्ष ठेवले जात असल्याचे स्पष्ट केले आहे. व्यापारी जहाजांवरील हल्ल्यांबाबत भारताने आंतरराष्ट्रीय स्तरावरही चिंता व्यक्त केली आहे. त्यामुळे हॉर्मुझमधील ताज्या घटनेनंतर भारतीय खलाशांच्या सुरक्षेसाठी राजनैतिक आणि सागरी पातळीवरील समन्वय अधिक महत्त्वाचा ठरणार आहे.
