महाराष्ट्रातील आयसिस दहशतवादी मॉड्यूल प्रकरणात मुंबईतील विशेष राष्ट्रीय तपास यंत्रणेच्या (एनआयए) न्यायालयाने पुण्यातील डॉक्टर अदनानअली सरकार यांना दोषी ठरवत सहा वर्षांच्या सश्रम कारावासाची शिक्षा सुनावली आहे. शनिवारी, ७ नोव्हेंबर रोजी न्यायालयाने हा निकाल दिला. तसेच त्यांना ६५ हजार रुपयांचा दंडही ठोठावण्यात आला आहे. राष्ट्रीय तपास यंत्रणेने (एनआयए) प्रसिद्धीपत्रकाद्वारे ही माहिती दिली.
अदनानअली सरकार यांना बेकायदेशीर कृत्ये प्रतिबंधक कायद्याच्या (यूएपीए) विविध कलमांनुसार दोषी ठरवण्यात आले आहे. यामध्ये कलम १३ (बेकायदेशीर कृत्यांसाठी शिक्षा), कलम १८ (कट रचणे), कलम २० (दहशतवादी संघटनेचे सदस्यत्व), कलम ३८ (दहशतवादी संघटनेच्या सदस्यत्वाशी संबंधित गुन्हा) आणि कलम ३९ (दहशतवादी संघटनेला समर्थन देणे) यांचा समावेश आहे.
याशिवाय पुरावे नष्ट करणे आणि गुन्हेगारी कट रचणे या आरोपांखाली भारतीय दंड संहितेच्या (आयपीसी) कलम २०१ आणि १२०-बी अंतर्गतही त्यांना दोषी ठरवण्यात आले आहे.
हे ही वाचा:
इस्रायलमध्ये गादी आयझेनकोट यांना सरकार स्थापनेचे निमंत्रण
पुणे मेट्रोमुळे शहराच्या अर्थकारणाला नवी गती
प्रकाशाचा सण अंधःकार विरोधातील संकल्पाचे प्रतीक
यशस्वी जायसवालचा सलग दुसरा शतकी धमाका
परदेशातील आयसीस हँडलर्सचा सहभाग उघड
एनआयएच्या प्रसिद्धीपत्रकानुसार, केंद्रीय गृह मंत्रालयाकडून भारताची एकता, अखंडता, सुरक्षा आणि सार्वभौमत्व धोक्यात आणण्याच्या उद्देशाने आयसीसने कट रचल्याची माहिती मिळाल्यानंतर एनआयएच्या मुंबई शाखेने २८ जून २०२३ रोजी स्वतःहून या प्रकरणाची नोंद केली होती.
तपासादरम्यान या प्रकरणात आंतरराष्ट्रीय संपर्क आणि परदेशात कार्यरत असलेल्या आयसिसच्या हँडलर्सचा सहभाग असलेले मोठे षडयंत्र उघड झाले. आरोपी दहशतवादी संघटनेची कट्टर विचारसरणी पसरवणे, नवीन सदस्यांची भरती करणे, दहशतवादी कारवायांसाठी निधी गोळा करणे आणि ‘व्हॉइस ऑफ हिंद’ तसेच ‘व्हॉइस ऑफ खोरासान’ यांसारखी संघटनेची प्रचारपत्रके प्रसारित करण्याच्या कामात सहभागी असल्याचे तपासात समोर आले.
अदनानअली सरकारव्यतिरिक्त या प्रकरणात आणखी पाच आरोपींविरोधात आरोपपत्र दाखल करण्यात आले होते. त्यांची नावे तबिश नासेर सिद्दीकी, झुल्फिकार अली बरोडावाला उर्फ लालाभाई, शर्जील शेख, आकिफ अतीक नाचन आणि जुबेर नूर मोहम्मद शेख उर्फ अबू नुसैबा अशी आहेत.
विशेष न्यायालयाने या सहाही आरोपींविरोधात आरोप निश्चित केले होते. सध्या सर्व आरोपी न्यायालयीन कोठडीत आहेत. अदनानअली सरकार यांना दोषी ठरवून शिक्षा सुनावण्यात आली असून, उर्वरित पाच आरोपींविरोधातील खटला सुरू राहणार असल्याचे एनआयएने स्पष्ट केले आहे.
जुलैमध्ये झाली होती अटक
एनआयएने भूलतज्ज्ञ असलेल्या अदनानअली सरकार यांना २७ जुलै २०२३ रोजी पुण्यातील कोंढवा परिसरातील त्यांच्या निवासस्थानी छापा टाकून अटक केली होती. या प्रकरणातील ही पाचवी अटक होती. त्यांच्या घराची झडती घेतल्यानंतर तपास यंत्रणेने आयसिसशी संबंधित इलेक्ट्रॉनिक उपकरणे आणि कागदपत्रे जप्त केल्याची माहिती दिली होती.
एनआयएच्या म्हणण्यानुसार, अदनानअली सरकार दहशतवादी संघटनेची हिंसक विचारसरणी प्रसारित करण्यास आणि तरुणांची भरती करण्यास सहभागी होते. अटकेनंतर जारी केलेल्या निवेदनात तपास यंत्रणेने आरोपीचा आयसिसशी असलेला संबंध आणि असुरक्षित तरुणांना संघटनेच्या हिंसक अजेंड्याकडे आकर्षित करून त्यांची भरती करण्यातील भूमिका उघड झाल्याचे म्हटले होते.
