राज्यातील महापालिकांची निवडणूक जाहीर झालेली असून या पार्श्वभूमीवर राज्यात राजकीय घडामोडींना वेग आलेला पाहायला मिळत आहे. अशातच उद्धव ठाकरे आणि राज ठाकरे यांनी संयुक्त पत्रकार परिषद घेत ठाकरे गट आणि मनसेच्या युतीची घोषणा केली. याबाबत मुख्यमंत्री देवेंद्र फडणवीस यांनी प्रतिक्रिया दिली आहे. दोन्ही पक्ष राजकीय प्रासंगिकता गमावूनही एकत्र येण्याबद्दल कृत्रिमरित्या प्रचार करण्याचा प्रयत्न करत आहेत, असे म्हणत देवेंद्र फडणवीस यांनी दोन्ही पक्षांवर टीका केली.
मनसे आणि ठाकरे गटाच्या युतीबद्दल पत्रकारांशी बोलताना देवेंद्र फडणवीस यांनी सांगितले की, या युतीला ऐतिहासिक घटना म्हणून सादर केले जात आहे. काही माध्यमं असं दाखवत होती जसे की, रशिया आणि युक्रेनचीच युती होते आहे. झेलेन्स्की निघाले, पुतिन निघाले आणि युती झाली. कुठल्याही पक्षाला अस्तित्व टिकवण्यासाठी जे करायचं असतं ते त्यांनी केलं. याने काही फार परिणाम होईल असं वाटत नाही, असं मत मांडत देवेंद्र फडणवीस यांनी या युतीला टोला लगावला.
मुख्यमंत्र्यांनी आरोप केला की दोन्ही पक्षांनी तुष्टीकरणाच्या राजकारणाद्वारे स्वतःला कमकुवत केले आहे, ज्यामुळे त्यांच्या मतांचा सतत ऱ्हास होत आहे. हे असे पक्ष आहेत ज्यांनी तुष्टीकरणाच्या राजकारणात गुंतल्यानंतर आणि त्यांचा पाठिंबा गमावल्यानंतर त्यांची प्रासंगिकता गमावली आहे. त्यांच्या एकत्र येण्याने लोकांना काहीही फायदा होत नाही, अशी सणसणीत टीका फडणवीस यांनी केली आहे.
देवेंद्र फडणवीस यांनी पुढे असा दावा केला की, ही युती विचारसरणीपेक्षा राजकीय हताशतेमुळे प्रेरित आहे. स्वतःचे अस्तित्व वाचवण्याच्या प्रयत्नात, त्यांनी हातमिळवणी केली आहे. त्यांना विश्वास आहे की, त्यांचा पक्ष एकटा जिंकू शकत नाही. मात्र, महाराष्ट्रातील जनतेने आमचे काम पाहिले आहे आणि त्या आधारावरच महायुती विजयी होईल, असा निर्धार मुख्यमंत्र्यांनी बोलून दाखवला.
हे ही वाचा..
सुकेश चंद्रशेखरने जॅकलीन फर्नांडिसला दिला बंगला भेट
‘ऑपरेशन डेव्हिल हंट फेज-२’ पुन्हा सुरू
टोरोंटोमध्ये भारतीय वंशाच्या महिलेची हत्या
उत्तर प्रदेशात महिला उद्योजकतेला मजबूत आधार
“भावनिक बोलण्याचा जनता विचार करत नाही. मुंबईकर महायुतीचं काम बघून, मुंबईचा विकास बघून मतं देतील. विशेषतः मराठी माणसाला मुंबईत घरं देण्याचा कार्यक्रम महायुतीने सुरु केला आहे. त्यामुळे मुंबईकर महायुतीच्या पाठिशी उभे राहतील,” असा विश्वासही देवेंद्र फडणवीस यांनी व्यक्त केला. पुढे ते म्हणाले की, ज्या प्रकारे ही पत्रकार परिषद झाली आणि जे वातावरण तयार केले होते त्यानुसार तर ‘खोदा पहाड और चुहाँ भी नहीं निकला.’ ठाकरे बंधूंनी लक्षात ठेवावं ते म्हणजे मुंबई नाहीत, ते म्हणजे मराठी नाहीत. ते म्हणजे सगळं काही असा जो त्यांचा गर्व आहे त्यामुळेच मुंबईकर त्यांच्यापासून दूर गेलेत. मुंबईकरांना सेवेकरी हवे आहेत, असे देवेंद्र फडणवीस म्हणाले.
