भारत आणि न्यूझीलंड यांच्यातील दोन कसोटी सामन्यांच्या मालिकेला गुरुवारपासून वेलिंग्टन येथे सुरुवात होणार आहे. या पहिल्या कसोटी सामन्यापूर्वी भारतीय कर्णधार शुभमन गिल याने संघाच्या प्लेइंग इलेव्हनबाबत महत्त्वाचे संकेत दिले आहेत. भारतीय संघ चार वेगवान गोलंदाजांसह मैदानात उतरू शकतो, असे त्याने सूचित केले आहे.
वेलिंग्टन कसोटीपूर्वी आयोजित पत्रकार परिषदेत शुभमन गिलने चार वेगवान गोलंदाजांसह खेळण्याचे संकेत दिले. मात्र, संघात चार पूर्णवेळ वेगवान गोलंदाज असतील की तीन वेगवान गोलंदाजांसह एका वेगवान गोलंदाजी करणाऱ्या अष्टपैलू खेळाडूला संधी दिली जाईल, हे त्याने स्पष्ट केले नाही.
हे ही वाचा:
अरविंद सावंत यांना प्रश्न झोंबला; कार्यकर्त्यांकडून पत्रकाराला दमदाटी
ट्रम्पकडून स्तुती पण मोदींनी ढुंकूनही बघितले नाही
ढाक्यातील हजरत शाहजलाल आंतरराष्ट्रीय विमानतळाजवळ दोन बॉम्बस्फोट
नोटबंदीने नक्षलवाद्यांचे आर्थिक कंबरडे मोडले
गिल म्हणाला, “आम्ही येथे झालेले कसोटी सामने पाहिले आहेत. पहिल्या दोन दिवसांचा खेळ वेगळ्या स्वरूपाचा असतो, तर पुढील तीन दिवसांचा खेळ काहीसा वेगळा असतो. हे लक्षात घेऊन आम्हाला अशी वेगवान गोलंदाजीची फळी हवी आहे, जी चेंडू स्विंग आणि सीम करू शकेल. तसेच खेळपट्टी सपाट झाल्यानंतरही प्रभावी गोलंदाजी करू शकेल.”
तो पुढे म्हणाला, “आम्हाला निश्चितपणे चार वेगवान गोलंदाजीचे पर्याय हवे आहेत. मात्र, हे गोलंदाज नेमके कोण असतील, याबाबत अद्याप निर्णय झालेला नाही. अनेकदा तिसऱ्या, चौथ्या आणि पाचव्या दिवशी विशेषतः जुना चेंडू वापरताना खेळपट्टी काहीशी सपाट होत असल्याचे आम्ही पाहिले आहे. त्यामुळे आमच्या वेगवान गोलंदाजीच्या फळीत चांगला वेग असलेला गोलंदाज, सातत्याने योग्य टप्प्यावर गोलंदाजी करणारा गोलंदाज असे पर्याय असणे आवश्यक आहे. याशिवाय एका बाजूने धावा रोखण्यासाठी एका फिरकीपटूलाही संधी द्यावी लागेल.”
“वारा वेगाने वाहत असेल तर त्याच्या विरुद्ध दिशेने गोलंदाजी करणे सोपे नसते. वाऱ्याच्या विरुद्ध दिशेने गोलंदाजी करताना वेगवान गोलंदाजाची प्रभावी क्षमता जवळपास निम्म्यावर येते. त्यामुळे अंतिम संघ निवडताना आम्हाला अनेक बाबींचा विचार करावा लागेल,” असेही गिलने स्पष्ट केले.
