अफगाणिस्तानविरुद्धच्या आगामी कसोटी आणि वनडे मालिकेसाठी भारतीय संघात निवड झालेल्या युवा अष्टपैलू हर्ष दुबे याने आपल्या क्रिकेट प्रवासातील एक मोठी खंत व्यक्त केली आहे. भारताचे दिग्गज फलंदाज रोहित शर्मा आणि विराट कोहली यांच्या निवृत्तीपूर्वी त्यांच्यासोबत मैदानावर खेळण्याची इच्छा होती, मात्र ते स्वप्न अपूर्णच राहिल्याचे त्याने सांगितले.
विदर्भकडून देशांतर्गत क्रिकेट खेळणाऱ्या हर्ष दुबेने जिओस्टारशी संवाद साधताना सांगितले की, क्रिकेट समजू लागल्यापासून तो रोहित आणि विराट यांना खेळताना पाहत मोठा झाला आहे.
“आज कोणत्याही युवा क्रिकेटपटूला विचारलं तर तो रोहित शर्मा आणि विराट कोहली यांच्यासोबत खेळण्याची इच्छा व्यक्त करेल. मी त्यांना पाहत मोठा झालो आहे. ते अनेक वर्षे भारतीय क्रिकेटचे आधारस्तंभ राहिले आहेत. त्यांच्यासोबत ड्रेसिंग रूम शेअर करणं हे माझ्यासाठी मोठं स्वप्न होतं,” असे दुबे म्हणाला.
“एका तरी दिग्गजासोबत खेळायचं होतं”
हर्षने सांगितले की, निवृत्तीपूर्वी किमान एका दिग्गज खेळाडूसोबत एक सामना खेळण्याची त्याची मनापासून इच्छा होती.
“मला नेहमी वाटायचं की एखाद्या दिग्गज खेळाडूच्या निवृत्तीपूर्वी त्याच्यासोबत किमान एक सामना खेळायला मिळावा. ते स्वप्न पूर्ण झालं असतं तर माझ्यासाठी तो अविस्मरणीय क्षण ठरला असता,” असे त्याने म्हटले.
भारतीय संघातील निवड अनपेक्षित
भारतीय संघात निवड होईल, अशी कल्पनाही नसल्याचे दुबेने स्पष्ट केले. त्याचे संपूर्ण लक्ष आयपीएलवर होते.
“माझं नाव श्रीलंका-अफगाणिस्तान ‘अ’ संघांच्या त्रिकोणी मालिकेसाठी जाहीर झालं तेव्हा मी त्याचाच विचार करत होतो. भारतीय संघात, तेही कसोटी आणि वनडे अशा दोन्ही संघांमध्ये निवड होईल, याचा मला अजिबात अंदाज नव्हता,” असे तो म्हणाला.
विमानतळावर कळली आनंदाची बातमी
भारतीय संघातील निवडीचा क्षण आठवताना दुबेने एक रंजक किस्सा सांगितला.
“आम्ही विमानतळावर होतो. फ्लाइटला एक तास उशीर झाला होता. तेवढ्यात एका क्रिकेट पोर्टलमधून फोन आला आणि वनडे मालिकेसाठी निवड झाल्याबद्दल विचारणा झाली. मला वाटलं ते ‘अ’ संघाच्या मालिकेबद्दल बोलत आहेत. फोन ठेवल्यानंतर अचानक अनेक संदेश येऊ लागले. मग मी ऑनलाइन पाहिलं आणि भारतीय संघात माझी निवड झाल्याचं समजलं. काही मिनिटे मला हे खरं आहे की स्वप्न, हेच समजत नव्हतं,” असे दुबेने सांगितले.
“भविष्याचा विचार नाही, आजवर लक्ष”
डावखुरा फिरकीपटू असलेल्या दुबेने दीर्घकालीन लक्ष्यांपेक्षा वर्तमानावर लक्ष केंद्रित करण्यावर भर दिला.
“प्रत्येक क्रिकेटपटूचं भारतासाठी खेळण्याचं स्वप्न असतं. पण मी २०२७ विश्वचषक किंवा पुढची दहा वर्षं याचा विचार करत नाही. आज जो सामना आहे, त्यात मी संघासाठी सर्वोत्तम काय करू शकतो, यावरच माझा भर असतो,” असे त्याने सांगितले.
शुभमन गिलच्या नेतृत्वाबद्दल उत्सुकता
भारतीय संघाचा कर्णधार शुभमन गिल याच्याबद्दलही दुबेने उत्सुकता व्यक्त केली.
“विरोधी संघातील खेळाडू म्हणून आपण एखाद्या व्यक्तीला पूर्णपणे ओळखू शकत नाही. शुभमन गिल माणूस म्हणून आणि कर्णधार म्हणून कसा आहे, हे जवळून पाहण्याची उत्सुकता आहे. मैदानावर आक्रमक आणि स्पर्धात्मक वृत्ती असलेल्या कर्णधारांसोबत खेळायला मला आवडतं,” असे दुबे म्हणाला.
