आशियाई क्रीडा स्पर्धा २०२६ मध्ये भारतीय महिला कंपाउंड तिरंदाजी संघाने सुवर्णपदकाला गवसणी घातली. चिकिथा तानिपार्थी, पृथिका प्रदीप आणि ज्योती सुरेखा वेन्नम यांच्या भारतीय त्रिकुटाने अंतिम फेरीत चीनचा २३८-२३४ असा पराभव करत सलग दुसऱ्यांदा विजेतेपदावर नाव कोरले. भारताचे या स्पर्धेतील हे सातवे सुवर्णपदक ठरले.
ओकाजाकी चुओ सोगो पार्क मल्टिपर्पज स्क्वेअर येथे झालेल्या अंतिम सामन्यात भारतीय खेळाडूंनी सुरुवातीपासूनच अचूक निशाणा साधत चीनवर दबाव कायम ठेवला. पहिल्या एंडमध्ये भारताने ३०-२८ अशी आघाडी घेतली. त्यानंतर प्रत्येक टप्प्यावर सातत्यपूर्ण कामगिरी करत भारतीय संघाने आपली आघाडी टिकवून ठेवली.
दुसऱ्या एंडमध्ये भारतीय खेळाडूंनी अचूकतेवर भर देत आघाडी ११९-११६ अशी तीन गुणांपर्यंत वाढवली. तिसऱ्या एंडमध्येही चीनच्या खेळाडूंनी जोरदार आव्हान दिले; मात्र पृथिका आणि ज्योती यांनी सातत्याने दहाच्या गुणांचे लक्ष्य भेदत भारताची आघाडी कायम राखली. तिसऱ्या एंडअखेर भारताकडे १७८-१७५ अशी आघाडी होती.
अंतिम एंडमध्ये चीनने सलग दहाच्या गुणांचे लक्ष्य साधत भारतीय संघावर दबाव निर्माण करण्याचा प्रयत्न केला. मात्र भारतीय त्रिकुटानेही शेवटच्या सहा बाणांमध्ये अचूक निशाणा साधत सर्वच बाण दहाच्या गुणांवर मारले. परिणामी भारताने २३८-२३४ अशा फरकाने विजय मिळवत सुवर्णपदक निश्चित केले.
भारतीय संघाने उपांत्य फेरीत दक्षिण कोरियाचा पराभव करून अंतिम फेरीत प्रवेश केला होता. अंतिम सामन्यातील २३८ गुणांची कामगिरी ही जागतिक विक्रमी कामगिरी ठरली. यापूर्वी २०१४ मध्ये इंचियोन येथे दक्षिण कोरियाच्या संघाने हा विक्रम नोंदवला होता.
हांगझोऊ येथे २०२३ मध्ये झालेल्या आशियाई क्रीडा स्पर्धेत भारतीय संघाने कंपाउंड तिरंदाजीमध्ये पाच सुवर्ण, दोन रौप्य आणि दोन कांस्य अशी एकूण नऊ पदके जिंकली होती. यंदाही भारतीय महिला संघाने सुवर्णपदक पटकावत विजेतेपद कायम राखले.
भारताच्या पदकतालिकेत ५३ पदके
या सुवर्णपदकासह आशियाई क्रीडा स्पर्धा २०२६ मध्ये भारताच्या एकूण पदकांची संख्या ५३ झाली आहे. भारताने आतापर्यंत ७ सुवर्ण, २१ रौप्य आणि २५ कांस्य अशी एकूण ५३ पदके जिंकली आहेत. महिला तिरंदाजांच्या या यशामुळे भारतीय क्रीडापटूंच्या पदक मोहिमेत आणखी एका सुवर्णपदकाची भर पडली आहे.
