भारतीय महिला क्रिकेट संघाचा डिसेंबर २०२६ मधील दक्षिण आफ्रिका दौरा अधिक रंगतदार झाला आहे. क्रिकेट दक्षिण आफ्रिकाने सुधारित वेळापत्रक जाहीर करत या दौऱ्यात तीन सामन्यांच्या टी-२० मालिकेचा समावेश केल्याची घोषणा केली. फेब्रुवारी २०२७ मध्ये श्रीलंकेत होणाऱ्या पहिल्या आयसीसी महिला चॅम्पियन्स ट्रॉफीच्या तयारीसाठी हा बदल करण्यात आला आहे.
भारतीय संघ ९ ते १२ डिसेंबरदरम्यान गकेबेरहा येथे एकमेव कसोटी सामना खेळेल. त्यानंतर १६, १९ आणि २२ डिसेंबर रोजी अनुक्रमे पार्ल, केपटाउन आणि ब्लॉमफोन्टेन येथे तीन वनडे सामने होतील.
यानंतर २६, २९ आणि ३० डिसेंबर रोजी बेनोनी आणि पोटचेफस्ट्रूम येथे तीन टी-२० सामने खेळवले जातील.
यापूर्वी एप्रिलमध्ये झालेल्या दक्षिण आफ्रिका दौऱ्यात भारतीय महिला संघाला पाच सामन्यांच्या टी-२० मालिकेत १-४ असा पराभव पत्करावा लागला होता. त्यामुळे या दौऱ्यात त्या पराभवाची परतफेड करण्याची संधी भारतीय संघाला मिळणार आहे.
सीएसएचे मुख्य कार्यकारी अधिकारी फोलेट्सी मोसेकी यांनी सांगितले की, भारतासारख्या बलाढ्य संघाविरुद्ध तिन्ही प्रकारांत खेळल्यामुळे दक्षिण आफ्रिकेच्या महिला संघाला आगामी महिला चॅम्पियन्स ट्रॉफीसाठी उत्तम तयारी करता येईल.
