अर्जेंटिनाचा फुटबॉल सम्राट लिओनेल मेसी याचा भारतातील बहुप्रतिक्षित दौरा अखेर निश्चित झाला असून, ‘जीओएटी टूर ऑफ इंडिया 2025’ ची सुरुवात कोलकात्यात १२ डिसेंबर रोजी होणार आहे. फुटबॉलप्रेमी शहर कोलकाता येथे या टूरचा पहिला टप्पा रंगणार असून, चाहत्यांसाठी विविध खास उपक्रम आयोजित केले जातील.
कोलकात्यात भव्य स्वागत
मेसी १२ डिसेंबरच्या रात्री कोलकात्यात दाखल होणार असून, १३ डिसेंबरला त्याचा दिवस चाहत्यांसोबत खास भेटीगाठींमध्ये, फूड आणि टी फेस्टिव्हलमध्ये, तसेच त्याच्या पुतळ्याच्या अनावरण सोहळ्यात व्यतीत होणार आहे. बंगाली खाद्यपदार्थ, विशेषत: हिलसा मासा, मेनूमध्ये असणार आहे. यावेळी दुर्गा पूजेनिमित्त मेसीचा भव्य भित्तिचित्र (म्युरल)ही साकारले जाणार आहे, जिथे चाहते संदेश आणि चित्रे टाकू शकतील.
या दिवशी ‘जीओएटी कॉन्सर्ट’ आणि ‘जीओएटी कप’ सामने ईडन गार्डन्स किंवा साल्ट लेक स्टेडियमवर होण्याची शक्यता असून, या सामन्यात सौरव गांगुली, लिएंडर पेस, जॉन अब्राहम आणि बायचुंग भुतिया सहभागी होणार आहेत. सुरक्षा व्यवस्थेसाठी कोलकाता पोलीस आणि मेसीची खास टीम सज्ज राहणार आहे.
अहमदाबाद, मुंबई आणि दिल्ली टप्पे
१३ डिसेंबरला मेसी अहमदाबादला जाईल, जिथे अदाणी फाउंडेशनच्या वतीने खासगी कार्यक्रम आयोजित केला आहे. १४ डिसेंबरला मुंबईत तो सीसीआय ब्रेबॉर्न येथे चाहत्यांना भेटेल, तसेच वानखेडे स्टेडियमवर ‘जीओएटी कप’ आणि ‘जीओएटी कॉन्सर्ट’ रंगणार आहेत. येथे सेलिब्रिटी पॅडल सामना देखील होणार असून, शाहरुख खान आणि लिएंडर पेस यांच्या सहभागाची शक्यता आहे.
दिल्लीतील समारोप
१५ डिसेंबरला मेसी नवी दिल्ली येथे पंतप्रधान नरेंद्र मोदी यांची पीएम निवासस्थानी भेट घेणार आहे. त्यानंतर फिरोजशहा कोटला मैदानावर ‘जीओएटी कॉन्सर्ट’ आणि ‘जीओएटी कप’ होईल, ज्यात विराट कोहली आणि शुभमन गिल यांच्या सहभागाची शक्यता व्यक्त केली जात आहे.
दौऱ्याचे प्रमोटर सतद्रु दत्ता यांनी सांगितले की, “मला अधिकृत मान्यता मिळाल्यानंतर मी ही माहिती सोशल मीडियावर जाहीर केली. मेसी २८ ऑगस्ट ते १ सप्टेंबर दरम्यान अधिकृत पोस्टर आणि छोट्या व्हिडिओसह आपला दौरा जाहीर करेल.”
२०११ नंतर मेसीचा हा दुसरा भारत दौरा असून, यावेळी देशभरातील फुटबॉलप्रेमींना त्याच्यासोबत अविस्मरणीय क्षण अनुभवण्याची संधी मिळणार आहे.
