भारताचा स्टार भालाफेकपटू नीरज चोप्रा टाचेतील लिगामेंटला दुखापत झाल्याने २०२६ च्या उर्वरित मोसमातून बाहेर पडला आहे. नीरजने सोशल मीडिया प्लॅटफॉर्म ‘एक्स’वर पोस्ट करत ही माहिती दिली. या दुखापतीमुळे त्याला आता एशियन गेम्स आणि डायमंड लीग फायनलला मुकावे लागणार आहे.
नीरजने सांगितले की, लॉझानमध्ये या मोसमातील सर्वोत्तम थ्रो केल्यानंतर प्रशिक्षणादरम्यान त्याच्या टाचेतील लिगामेंट फाटले. डॉक्टर आणि टीमशी चर्चा केल्यानंतर उर्वरित मोसमातून माघार घेण्याचा निर्णय घेण्यात आला.
“ही गोष्ट खूपच निराशाजनक आहे. मी पुन्हा माझी लय मिळवण्याच्या अगदी जवळ होतो. आता माझे संपूर्ण लक्ष योग्य प्रकारे रिकव्हरी करण्यावर आणि अधिक मजबूतपणे पुनरागमन करण्यावर आहे,” असे नीरजने म्हटले.
या मोसमात केवळ दोन स्पर्धांमध्ये सहभागी होऊनही नीरजने डायमंड लीग फायनलसाठी पात्रता मिळवली होती. ही अंतिम स्पर्धा ४ आणि ५ सप्टेंबर रोजी होणार होती.
लॉझान डायमंड लीगमध्ये नीरजने ८८.०५ मीटरची भालाफेक करत मोसमातील सर्वोत्तम कामगिरी केली होती. मात्र, श्रीलंकेच्या रुमेश थरंगाने ८८.१४ मीटरच्या थ्रोसह विजेतेपद पटकावले.
याआधी कॉमनवेल्थ गेम्स २०२६मध्ये नीरजने ८५.८३ मीटरच्या थ्रोसह रौप्यपदक जिंकले होते. तर दोहा डायमंड लीगमध्ये ८५.६९ मीटरच्या कामगिरीसह तो चौथ्या स्थानावर राहिला होता.
