छत्तीसगडमधील सुकमा येथील कुकानार पोलीस स्टेशन परिसरात पोलिस आणि नक्षलवाद्यांमध्ये भीषण चकमक झाल्याचे वृत्त आहे. नक्षलवाद्यांनी नुकताच आयईडी स्फोट घडवून आणला होता, ज्यामध्ये एएसपी आकाश राव गिरपुंजे हुतात्मा झाले. या घटनेनंतर संपूर्ण जिल्ह्यात सुरक्षा दलांकडून शोधमोहीम सुरु करण्यात आली. सुरक्षा दलाच्या कारवाईत दोन नक्षलवादी ठार झाल्याचे समोर आले आहे. घटनास्थळावरून स्वयंचलित शस्त्रे आणि नक्षलवादी साहित्य देखील जप्त करण्यात आले आहे.
सुकमा जिल्ह्यातील कुकनार पोलीस स्टेशन परिसरातील जंगलात सुरक्षा दलांशी झालेल्या चकमकीत दोन नक्षलवादी ठार झाल्याचे सुकमाचे एसपी किरण चव्हाण यांनी सांगितले. घटनास्थळावरून स्वयंचलित शस्त्रे देखील जप्त करण्यात आली आहेत. चकमक आणि शोध मोहीम सुरू आहे. ठार झालेल्या दोन नक्षलवाद्यांमध्ये एक नक्षली महिलेचा समावेश आहे.
ठार झालेल्या नक्षलवाद्यांपैकी एकाची ओळख पटली असून तो पेद्रास येथील स्थानिक संघटना पथकाचा (एलओएस) कमांडर बामन आहे, ज्याच्या डोक्यावर ५ लाख रुपयांचे बक्षीस होते. चकमकीनंतर सापडलेल्या महिला नक्षलवादी कॅडरची ओळख अद्याप पटलेली नाही.
हे ही वाचा :
ठाणे मनपा ऍथलेटिक्स प्रशिक्षण योजनेच्या खेळाडूंनी सोने लुटले
ज्योती मल्होत्राचा जामीन अर्ज कोर्टाने फेटाळला!
भारताने केलेल्या वस्त्रहरणानंतर पाकिस्तानने ‘झाकली’ लाज
राजा रघुवंशीच्या हत्येच्या कटात सहभागी असल्याची सोनमची कबुली, पुरावे पाहून रडली!
चकमकीच्या ठिकाणाहून एक इन्सास रायफल, एक १२ बोर रायफल, तसेच इतर शस्त्रे, दारूगोळा आणि स्फोटके जप्त करण्यात आली आहेत. अतिरिक्त सहाय्यक पथके तैनात करण्यात आली आहेत आणि पळून गेलेल्या इतर माओवादी कॅडरना शोधण्यासाठी आणि त्यांना पकडण्यासाठी आजूबाजूच्या घनदाट जंगलात सखोल शोध मोहीम सुरू आहे.
