उत्तर प्रदेशात सलग सुमारे ६० तास झालेल्या मुसळधार पावसामुळे मोठे नुकसान झाले असून, राज्य सरकारच्या आकडेवारीनुसार आतापर्यंत किमान ५६ जणांचा मृत्यू, तर ४६ जण जखमी झाले आहेत. या पावसामुळे १०७ जनावरांचाही मृत्यू झाला असून, १,०२१ घरांचे नुकसान झाले आहे.
पावसाशी संबंधित दुर्घटनांमध्ये अनेक जिल्ह्यांमध्ये नागरिकांचा मृत्यू झाला आहे. सीतापूरमध्ये सर्वाधिक ७ जणांचा मृत्यू झाला आहे. त्यानंतर लखीमपूर खेरी, बहराइच आणि बलरामपूरमध्ये प्रत्येकी ५ जणांचा, तर अयोध्या आणि गोरखपूरमध्ये प्रत्येकी ४ जणांचा मृत्यू झाला आहे. जखमींच्या संख्येचा विचार केला तर हरदोईमध्ये ७ जण जखमी झाले आहेत. मैनपुरी, श्रावस्ती आणि बाराबंकीमध्ये प्रत्येकी ५ जण, तर सीतापूर आणि लखीमपूर खेरीमध्ये प्रत्येकी ३ जण जखमी झाले आहेत.
पावसामुळे जनावरांचेही मोठ्या प्रमाणात नुकसान झाले आहे. हरदोईमध्ये सर्वाधिक २८ जनावरांचा मृत्यू झाला. त्यानंतर सीतापूरमध्ये १६ आणि कन्नौजमध्ये १४ जनावरांचा मृत्यू झाला आहे. बहराइच आणि कानपूर देहातमध्ये प्रत्येकी ७, तर उन्नावमध्ये ६ जनावरांचा मृत्यू झाला आहे.
हे ही वाचा:
ज्ञानेशकुमारांविरोधात ठाण्यात काँग्रेसचे आंदोलन
राष्ट्रीय निवडणूक आयोगाने घेतले ९ नवे निर्णय
२५ रुपये लिटर इंधनावर धावणार कार
श्रीशंकर, पट्टुराज लॉन्ग जंपच्या अंतिम फेरीत
हवामानाच्या आकडेवारीनुसार, शनिवारी सकाळपर्यंतच्या मागील २१ तासांत लखनऊमध्ये १२५.८ मिलिमीटर पाऊस झाला. फर्रुखाबादमध्ये सामान्यपेक्षा २०० पट अधिक पावसाची नोंद झाली. कानपूर नगरमध्ये सामान्यपेक्षा १६० पट, तर कन्नौज, कानपूर देहात आणि हरदोईमध्ये सामान्यपेक्षा १३० पट अधिक पाऊस पडला.
भारतीय हवामान विभागाने शनिवारी पूर्व उत्तर प्रदेशातील अनेक भागांत मुसळधार ते अतिमुसळधार पावसाचा अंदाज व्यक्त केला होता. रविवारीही अनेक ठिकाणी पाऊस आणि मेघगर्जनेसह सरी कोसळण्याची शक्यता वर्तवण्यात आली होती. ईशान्य मध्य प्रदेश आणि लगतच्या उत्तर छत्तीसगडवर निर्माण झालेले कमी दाबाचे क्षेत्र अर्थात डिप्रेशन उत्तर-उत्तर-पश्चिम दिशेने दक्षिण-पूर्व उत्तर प्रदेशाच्या दिशेने सरकत होते. शनिवारी पहाटे साडेपाच वाजता ही हवामान प्रणाली प्रयागराजच्या सुमारे २३० किलोमीटर दक्षिणेला केंद्रित होती.
अयोध्येतही पावसाचा परिणाम
अयोध्येत पाऊस आणि जोरदार वाऱ्याचा परिणाम रामपथ, राम मंदिर, हनुमानगढी, कनक भवन आणि सरयू परिसरातील वाहतुकीवर झाला. भाविक राम मंदिरात दर्शनासाठी येत राहिले; मात्र पाणी साचल्यामुळे आणि जोरदार वाऱ्यामुळे परिसरात फिरताना अडचणींचा सामना करावा लागला.
