पाकिस्तानने नापाक कृत्य केल्यास घुसून मारू

ऑपरेशन सिंदूरच्या यशानंतर आणि पाकिस्तान पुरस्कृत दहशतवादाला पाच देशांमध्ये उघड करून भारतात परतलेल्या सर्वपक्षीय प्रतिनिधीमंडळातील आम आदमी पक्षाचे खासदार अशोक कुमार मित्तल यांनी म्हटले की, दहशतवादाविरोधात भारतासोबत सर्व देशांनी एकजूट दाखवली आहे. ते म्हणाले, “आपण शांतताप्रिय देश आहोत, पण जर पाकिस्तान नापाक कृत्य करत राहिला, तर आम्ही एकएकाला ठार मारू.” गुरुवारी मित्तल म्हणाले की, “आम्ही रशिया, स्पेन, ग्रीस, स्लोव्हेनिया आणि लाटविया या देशांचा दौरा केला. तिथे आम्ही परराष्ट्र मंत्र्यांशी किंवा त्यांच्या उपमंत्र्यांशी आणि इतर अधिकृत प्रतिनिधींशी भेट घेतली. आम्ही खासदार, प्रसारमाध्यमे आणि थिंक टँक्स यांच्याशी संवाद साधला.”

“आम्ही स्पष्ट सांगितले की भारत हा शांतताप्रिय देश आहे. भारत ‘वसुधैव कुटुंबकम्’ या तत्वात विश्वास ठेवतो, ज्याचा अर्थ आहे – संपूर्ण जग एक कुटुंब आहे. पण आमचा शेजारी पाकिस्तान भारतात सतत दहशतवादी कारवाया करत असतो.” मित्तल यांनी पुढे सांगितले, “जम्मू-काश्मीर वेगाने प्रगती करत होता, उद्योग उभे राहत होते. सर्व काही सुरळीत सुरू होते. मात्र, पहलगाममध्ये एक दहशतवादी हल्ला घडवून आणण्यात आला. २६ निष्पाप नागरिकांची निर्दय हत्या करण्यात आली. या कटामागे हिंदू-मुस्लिमांमध्ये फूट पाडण्याचा प्रयत्न होता. २२ एप्रिल रोजी हल्ला झाला. आम्ही वाट पाहत होतो की पाकिस्तान त्याच्या देशातील दहशतवाद्यांविरोधात कारवाई करेल. पण तसे झाले नाही.”

हेही वाचा..

लोक चेंगरून मरत असताना प्रशासन मंत्र्यांच्या मुलाच्या सरबराईत व्यस्त!

अमेरिकेने गाझामध्ये युद्धविरामाचा मसुदा प्रस्ताव व्हेटो केला

तृणमूल खासदार महुआ मोईत्रा आणि बीजेडीचे खासदार पिनाकी मिश्रांची लग्नयुती

आगामी काळात IPO बाजार राहणार तेजीत

“मग भारताने ९ दहशतवादी तळ उद्ध्वस्त केले. ऑपरेशन सिंदूर दरम्यान आम्ही कोणत्याही पाकिस्तानी नागरिकाला लक्ष्य केले नाही. पण जर पाकिस्तानने आपल्या नापाक कृत्यांपासून परावृत्त न झाल्यास, आम्ही पुढेही एकेकाला शोधून ठार करू.” विदेश दौऱ्याच्या संदर्भात विचारलेल्या एका प्रश्नावर मित्तल म्हणाले की, “परराष्ट्र मंत्री आमच्याकडून फीडबॅक घेत होते. आम्ही त्यांना सांगितले की बहुतांश देश भारताच्या बाजूने आहेत. पाकिस्तान दहशतवादाचे केंद्र आहे. परराष्ट्र मंत्री म्हणाले की, ते पंतप्रधान मोदींना याची माहिती देतील.”

पंतप्रधानांशी भेट होणार का, या प्रश्नावर मित्तल म्हणाले की, “आत्तापर्यंत अशी कोणतीही माहिती नाही, पण जेव्हा माहिती मिळेल, तेव्हा नक्कीच भेट घेऊ.” पावसाळी अधिवेशन आणि पहलगाम मुद्दा उपस्थित करण्याविषयी ते म्हणाले, “ही चांगली बाब आहे. मी स्वतः विरोधी पक्षात असून आम्ही विशेष अधिवेशनाची मागणी करत होतो. आता पावसाळी अधिवेशन जाहीर झाले आहे, त्यामुळे हा मुद्दा उपस्थित केला जाईल.” बेंगळुरूतील चेंगराचेंगरीत ११ लोकांचा मृत्यू या घटनेवर प्रतिक्रिया देताना मित्तल म्हणाले, “ही घटना अत्यंत दुःखद आहे आणि मला खूप वाईट वाटते.”