भारतीय संगीतविश्वातील दिग्गज गायिका आशा भोसले यांच्या निधनानंतर देशभरातून शोक व्यक्त केला जात आहे. महाराष्ट्राचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनीही अत्यंत भावनिक शब्दांत श्रद्धांजली अर्पण केली आहे.
आशा भोसले यांच्या निधनाने भारतीय संगीतविश्वाला मोठा धक्का बसला आहे. मुंबईतील रुग्णालयात उपचारादरम्यान त्यांनी अखेरचा श्वास घेतला. त्यांच्या निधनाची बातमी समोर येताच राजकीय, सांस्कृतिक आणि चित्रपटसृष्टीत शोककळा पसरली. देवेंद्र फडणवीस यांनी आपल्या प्रतिक्रियेत म्हटले की, आशाताईंनी भारतीय संगीताला दिलेले योगदान अतुलनीय आहे. त्यांच्या आवाजाने अनेक पिढ्यांना मंत्रमुग्ध केले आणि भारताच्या सांस्कृतिक इतिहासात त्यांचे स्थान अजरामर राहील. त्यांनी हेही नमूद केले की, आशाताईंचा शताब्दी वाढदिवस साजरा करण्याची इच्छा होती, मात्र ती पूर्ण होऊ शकली नाही, याचे दुःख कायम राहील.
हे ही वाचा:
आशाताईंच्या चतुरस्त्र गायकीने तृप्त केले!
तुमचं घर जिहादपासून सुरक्षित आहे का?
इस्लामाबादमध्ये ठेंगा; इराण अमेरिका चर्चा निष्फळ
मुख्यमंत्री फडणवीस यांनी पुढे सांगितले की, आशा भोसले यांचे निधन हे केवळ एका कलाकाराचे जाणे नसून संपूर्ण संगीतविश्वासाठी मोठी हानी आहे. त्यांच्या कुटुंबीयांच्या संमतीने शासकीय इतमामात अंत्यसंस्कार करण्यात येणार असल्याची माहितीही त्यांनी दिली.
दरम्यान, उपमुख्यमंत्री एकनाथ शिंदे यांनीही आशाताईंना श्रद्धांजली अर्पण करताना त्यांना “संगीताची अमूल्य परंपरा जपणारी महान गायिका” असे संबोधले. त्यांनी म्हटले की, आशा भोसले यांचा आवाज हा भारताची ओळख होता आणि त्यांच्या गाण्यांनी जगभरातील श्रोत्यांच्या मनावर अधिराज्य गाजवले. त्यांच्या निधनामुळे संगीतविश्वात कधीही न भरून येणारी पोकळी निर्माण झाली आहे.
शिंदे यांनी पुढे नमूद केले की, आशाताईंच्या गाण्यांमध्ये विविधता, ऊर्जा आणि भावनिक खोली होती. हिंदी, मराठीसह अनेक भाषांमध्ये त्यांनी हजारो गाणी गाऊन एक अद्वितीय ठसा उमटवला. त्यांच्या योगदानामुळे भारतीय संगीताला जागतिक स्तरावर ओळख मिळाली. एकूणच, आशा भोसले यांच्या निधनाने संपूर्ण देश शोकमग्न झाला असून, त्यांच्या स्मृतींना अभिवादन करताना सर्वच स्तरांतून भावपूर्ण श्रद्धांजली वाहिली जात आहे. त्यांच्या सुरांचा वारसा कायम प्रेरणा देत राहील. दरम्यान उपमुख्यमंत्री सुनेत्रा पवार यांनी देखील आशाताई भोसले यांच्या निधनाबद्दल दुख व्यक्त केेले आहे.
