भारतात लवकरच नव्या चित्त्यांचे आगमन होणार आहे. दक्षिण आफ्रिकेतील बोत्सवाना येथून आठ चित्ते दोन टप्प्यात भारतात आणले जातील, अशी माहिती समोर आली आहे. यासंबंधीची माहिती राष्ट्रीय व्याघ्र संवर्धन प्राधिकरणाच्या (एनटीसीए) अधिकाऱ्यांनी शुक्रवारी भोपाळमध्ये केंद्रीय पर्यावरण, वन आणि हवामान बदल मंत्री भूपेंद्र यादव आणि मध्य प्रदेशचे मुख्यमंत्री मोहन यादव यांच्या उपस्थितीत चित्ता प्रकल्पाच्या आढावा बैठकीत दिली.
“दक्षिण आफ्रिका, बोत्सवाना आणि केनिया येथून अधिक चित्ते भारतात आणण्याचे प्रयत्न सुरू आहेत. दोन टप्प्यात आठ चित्ते भारतात आणले जातील. मे महिन्यापर्यंत बोत्सवाना येथून चार चित्ते भारतात आणण्याची योजना आहे. त्यानंतर आणखी चार चित्ते आणले जातील. सध्या भारत आणि केनिया यांच्यातील करारावर सहमती विकसित केली जात आहे,” असे एनटीसीए अधिकाऱ्यांनी सांगितले.
बैठकीत, एनटीसीए अधिकाऱ्यांनी माहिती दिली की, देशातील चित्ता प्रकल्पावर आतापर्यंत ११२ कोटी रुपयांपेक्षा जास्त खर्च झाला आहे, त्यापैकी ६७ टक्के खर्च मध्य प्रदेशातील चित्ता पुनर्वसनासाठी गेला आहे, असे प्रसिद्धीपत्रकात म्हटले आहे. “प्रोजेक्ट चित्ता अंतर्गत, चित्त्यांना आता टप्प्याटप्प्याने गांधी सागर अभयारण्यात स्थलांतरित केले जाईल. हे अभयारण्य राजस्थानच्या सीमेला लागून आहे, त्यामुळे मध्य प्रदेश आणि राजस्थानमध्ये आंतरराज्य चित्ता संवर्धन क्षेत्र स्थापन करण्यासाठी तत्वतः करार झाला आहे,” असे प्रसिद्धीपत्रकात म्हटले आहे. कुनो राष्ट्रीय उद्यान आणि गांधी सागर अभयारण्यातील चित्ता मित्रांना त्यांची क्षमता वाढवण्यासाठी विशेष प्रशिक्षण दिले जात आहे, असेही त्यात म्हटले आहे.
बैठकीत वन अधिकाऱ्यांनी माहिती दिली की कुनो राष्ट्रीय उद्यानात २६ चित्ते आहेत, त्यापैकी १६ खुल्या जंगलात आणि १० पुनर्वसन केंद्रात (बंदिस्त) आहेत. अधिकाऱ्यांनी सांगितले की, चित्त्यांवर लक्ष ठेवण्यासाठी सॅटेलाइट कॉलर आयडी वापरून २४ तास ट्रॅकिंग केले जाते. ज्वाला, आशा, गामिनी आणि वीरा या मादी चित्त्यांनी पिल्लांना जन्म दिला आहे, असे त्यांनी सांगितले. केएनपीमध्ये पर्यटकांची संख्या दोन वर्षांत दुप्पट झाली आहे. “कुनोमध्ये चित्ता सफारी सुरू करण्याची परवानगी मागण्यासाठी राज्य सरकारने सर्वोच्च न्यायालयात याचिका दाखल केली आहे. वनक्षेत्रात किंवा पर्यावरण-संवेदनशील क्षेत्रात सफारी सुरू करण्यासाठी ही परवानगी आवश्यक आहे. या याचिकेवर अद्याप निर्णय झालेला नाही,” असे निवेदनात म्हटले आहे.
हे ही वाचा :
गुजरातमध्ये ‘इंडी’ आघाडीत फूट; काँग्रेस पोटनिवडणुका स्वबळावर लढणार!
बांगलादेशात हिंदू नेत्याचे अपहरण करून निर्घृण हत्या
दिल्लीत इमारत कोसळून चार जणांचा मृत्यू
जम्मू आणि काश्मीरमध्ये सैनिकांकडून प्राध्यापकाला मारहाण?
१७ सप्टेंबर २०२२ रोजी केएनपीमध्ये पाच मादी आणि तीन नर असलेले आठ नामिबियन चित्ते सोडण्यात आले, जे मोठ्या मांजरींचे पहिलेच आंतरखंडीय स्थलांतर होते. फेब्रुवारी २०२३ मध्ये, दक्षिण आफ्रिकेतून केएनपीमध्ये आणखी १२ चित्ते स्थलांतरित करण्यात आले. कुनो राष्ट्रीय उद्यानात २६ चित्ते आहेत, ज्यात भारतात जन्मलेल्या १४ शावकांचा समावेश आहे.
