पंतप्रधान नरेंद्र मोदी यांनी जगातील सर्वात जेष्ठ मॅराथॉन धावपटू फौजा सिंह यांच्या निधनाबद्दल तीव्र दुःख व्यक्त केले आहे. त्यांनी फौजा सिंह यांना “एक उत्कृष्ट अॅथलीट आणि भारतातील तरुणांसाठी प्रेरणास्थान” म्हणून गौरवले.
पंतप्रधान मोदी यांनी सोशल मीडिया प्लॅटफॉर्म ‘एक्स’ (X) वर लिहिले –
“फौजा सिंह हे असामान्य व्यक्तिमत्त्व होते. त्यांनी त्यांच्या फिटनेसच्या जोरावर आणि खास व्यक्तिमत्त्वाच्या माध्यमातून अनेक तरुणांना प्रेरित केले. त्यांचा निर्धार आणि शिस्त वाखाणण्याजोगी होती. त्यांच्या निधनाची बातमी ऐकून मन हेलावून गेले. माझ्या संवेदना त्यांच्या कुटुंबीयांसोबत आणि जगभरातील त्यांच्या चाहत्यांसोबत आहेत.”
अपघातात झाला दुर्दैवी अंत
११४ वर्षीय फौजा सिंह यांचा सोमवारी सकाळी सैर करत असताना एका भरधाव कारने धडक दिल्याने मृत्यू झाला. अपघातानंतर कारचालक घटनास्थळावरून फरार झाला. फौजा सिंह यांना गंभीर अवस्थेत जालंधरमधील एका खासगी रुग्णालयात दाखल करण्यात आले होते, मात्र उपचारादरम्यान त्यांचे निधन झाले.
पोलिसांनी घटनास्थळाचा पंचनामा केला असून सीसीटीव्ही फुटेज तपासत आहेत. प्रत्यक्षदर्शींना विचारपूस करून आरोपी चालकाचा शोध घेतला जात आहे.
एका जिद्दी जीवनाची प्रेरणादायी कहाणी
फौजा सिंह यांचा जन्म १ एप्रिल १९११ रोजी पंजाबमधील ब्यास पिंड (जिल्हा जालंधर) येथे झाला. चार भावंडांमध्ये ते सगळ्यात लहान आणि लहानपणी कमकुवत प्रकृतीचे होते. ५ व्या वर्षापर्यंत ते चालूही शकत नव्हते, पण त्यांच्या असीम इच्छाशक्तीने त्यांचे संपूर्ण आयुष्य घडवले.
वयाच्या १०० व्या वर्षी, त्यांनी २०११ मध्ये टोरांटो मॅराथॉन पूर्ण केली. ८ तास, ११ मिनिटे आणि ६ सेकंदांमध्ये ही मॅराथॉन पूर्ण करत त्यांनी जगातील पहिल्या १०० वर्षीय मॅराथॉन धावपटूचा विक्रम केला आणि त्यांना जागतिक ओळख मिळाली.
आठवण:
“वय कितीही असो, धावायचंच!” – फौजा सिंह यांच्या जीवनाचा हा संदेश आजही लाखो जणांच्या मनात जिवंत राहील.
