रमन लांबा हे १९८०–९० च्या दशकात भारतीय देशांतर्गत क्रिकेटमध्ये चमकलेले, आक्रमक आणि स्टायलिश फलंदाज म्हणून ओळखले जात होते. मर्यादित आंतरराष्ट्रीय कारकीर्द असूनही भारतासह आयर्लंड आणि बांगलादेशमध्ये त्यांनी चाहत्यांची मने जिंकली.
२ जानेवारी १९६० रोजी मेरठ येथे जन्मलेल्या रमन लांबा यांनी सातत्यपूर्ण कामगिरीच्या जोरावर भारतीय संघात स्थान मिळवले. ऑस्ट्रेलियाविरुद्धच्या पदार्पणाच्या सामन्यातच त्यांनी ५३ चेंडूंमध्ये १ षटकार आणि ८ चौकारांसह ६४ धावांची खेळी करत आपली छाप पाडली.
१९८९ च्या नेहरू चषकात कृष्णमाचारी श्रीकांत यांच्यासोबत त्यांनी पाकिस्तान आणि ऑस्ट्रेलियाविरुद्ध शतकी सलामी भागीदाऱ्या केल्या. पाकिस्तानविरुद्ध १२० तर ऑस्ट्रेलियाविरुद्ध पहिल्या विकेटसाठी ११५ धावांची भागीदारी झाली. या दोन्ही सामन्यांत लांबा यांनी ५७–५७ धावांच्या संस्मरणीय खेळी केल्या.
एकदिवसीय क्रिकेटमध्ये १९८६ ते १९८९ या काळात त्यांनी भारताकडून ३२ सामने खेळत २७ च्या सरासरीने ७८३ धावा केल्या. यामध्ये १ शतक आणि ६ अर्धशतकांचा समावेश आहे. कसोटी क्रिकेटमध्ये ४ सामन्यांच्या ५ डावांत त्यांनी १०२ धावा केल्या.
प्रथम श्रेणी क्रिकेटमध्ये मात्र रमन लांबा यांची कामगिरी अतिशय भक्कम होती. १२१ सामन्यांत ५३.८४ च्या सरासरीने ८,७७६ धावा, ३१ शतके आणि २७ अर्धशतके—त्यात दोन त्रिशतकांचाही समावेश—ही त्यांची देशांतर्गत कामगिरी त्यांच्या गुणवत्तेची साक्ष देते. लिस्ट ‘ए’ क्रिकेटमध्येही त्यांनी ८२ सामन्यांत २,५४३ धावा केल्या.
भारतीय संघात संधी मर्यादित राहिल्यानंतर लांबा यांनी आयर्लंडमध्ये क्लब क्रिकेट खेळले. नॉर्थ डाउन, वुडवेल, क्लिफ्टनव्हिल आणि आर्डमोर या क्लबकडून खेळताना त्यांनी अनौपचारिक एकदिवसीय सामन्यांतही प्रतिनिधित्व केले. याच काळात त्यांची ओळख किम मिचेल क्रॉथर यांच्याशी झाली आणि पुढे विवाह झाला.
दिल्लीसाठी ४५ व्या वर्षापर्यंत खेळण्याची त्यांची इच्छा होती; मात्र १९९८ मध्ये बांगलादेशात क्लब सामन्यात फॉरवर्ड शॉर्ट लेगवर क्षेत्ररक्षण करताना डोक्याला गंभीर दुखापत झाली. कोमात गेलेल्या रमन लांबा यांचे २२ फेब्रुवारी १९९८ रोजी निधन झाले. अल्प कारकीर्दीतही त्यांनी क्रिकेटप्रेमींच्या मनात कायमस्वरूपी स्थान निर्माण केले.
