एका वृत्तसंस्थेच्या अहवालात असा दावा करण्यात आला होता की, रुपयावरील दबाव आणि वाढत्या आयात खर्चाच्या पार्श्वभूमीवर देशाचा परकीय चलन साठा वाचवण्याच्या प्रयत्नात मध्यवर्ती बँकेने २२ मे रोजी संपलेल्या दोन आठवड्यांच्या कालावधीत सुमारे १२ अब्ज डॉलर्स किमतीचे सोने विकले होते. भारताचा परकीय चलन साठा वाढवण्यासाठी मध्यवर्ती बँकेने १२ अब्ज डॉलर किमतीचे सोने विकल्याचा दावा करणारे माध्यमांचे वृत्त अर्थ मंत्रालयातील सूत्रांनी बुधवारी फेटाळून लावले. यासंबंधीचे वृत्त एएनआयने दिले आहे. अर्थ मंत्रालयाच्या सूत्रांनी एएनआयला सांगितले की, मध्यवर्ती बँकेने असा अहवाल फेटाळला आहे.
दरम्यान, आरबीआयच्या २०२५-२६ च्या ताज्या वार्षिक अहवालात असे दिसून आले आहे की, आर्थिक वर्षात मध्यवर्ती बँकेकडील सोन्याचा साठा प्रत्यक्षात वाढला आहे, ज्यामुळे या मौल्यवान धातूच्या मोठ्या प्रमाणावर विक्रीच्या दाव्यांचे खंडन होते. आरबीआयच्या वार्षिक अहवालानुसार, “३१ मार्च २०२६ रोजी रिझर्व्ह बँकेकडे एकूण ८८०.५२ मेट्रिक टन सोने होते, तर ३१ मार्च २०२५ रोजी हे प्रमाण ८७९.५८ मेट्रिक टन होते. यावरून असे दिसून येते की, या वर्षात सोन्यामध्ये ०.९४ मेट्रिक टनाची वाढ झाली आहे.”
आकडेवारीनुसार, आरबीआयने आर्थिक वर्ष २०२६ मध्ये आपला सुवर्णसाठा कमी करण्याऐवजी त्यात वाढ केली. अहवालात पुढे नमूद केले आहे की, मध्यवर्ती बँकेकडे असलेल्या एकूण ८८०.५२ मेट्रिक टन सोन्यापैकी, ३१२.३२ मेट्रिक टन सोने इश्यू विभागाची मालमत्ता म्हणून, तर उर्वरित ५६८.२० मेट्रिक टन सोने बँकिंग विभागाअंतर्गत ठेवण्यात आले होते.
आरबीआयच्या वार्षिक हिशेबांमधून तिच्याकडील सोन्याच्या साठ्याच्या मूल्यात लक्षणीय वाढ झाल्याचेही दिसून येते, जी प्रामुख्याने जागतिक सोन्याच्या किमतीतील वाढ आणि अमेरिकन डॉलरच्या तुलनेत भारतीय रुपयाच्या अवमूल्यनामुळे झाली आहे. आर्थिक वर्ष २०२६ दरम्यान बँकिंग विभागाची मालमत्ता म्हणून ठेवलेल्या सोन्याच्या मूल्यात ६३.६ टक्क्यांनी वाढ झाली.
हे ही वाचा:
बुलेट ट्रेनसाठीचा पालघरमधील तिसरा पर्वतीय बोगदा पूर्ण
वाळवीने पैसे खाल्ले! १ कोटींच्या नोटा फस्त
रणवीरची बंदीविरोधात न्यायालयात धाव
इराणकडून कुवेत, बहारीनमधील अमेरिकी लष्करी तळ लक्ष्य
वार्षिक अहवालात असेही दिसून येते की, भारताचा परकीय चलन साठा मजबूत राहिला असून, ३१ मार्च २०२६ रोजी तो मागील वर्षीच्या ६६८.३३ अब्ज डॉलर्सच्या तुलनेत ६९१.११ अब्ज डॉलर्सवर पोहोचला आहे. सोन्याच्या ठेवींसहित एकूण सुवर्णसाठ्यात मूल्याच्या दृष्टीने मोठी वाढ होऊन तो मागील वर्षीच्या ७८.१८ अब्ज डॉलर्सवरून ११५.४० अब्ज डॉलर्सवर पोहोचला आहे.
आरबीआयची लेखापरीक्षित ताळेबंद आणि राखीव निधीची आकडेवारी यावरून हे स्पष्टपणे दिसून येते की, मध्यवर्ती बँकेकडे मोठ्या प्रमाणात सोन्याचा साठा आहे आणि १२ अब्ज डॉलर्सच्या सोन्याच्या विक्रीचे वृत्त अधिकृत नोंदींमध्ये आढळत नाही.
