अमेरिकेचे राष्ट्राध्यक्ष डोनाल्ड ट्रम्प यांनी व्हाईट हाऊसमधील ओव्हल ऑफिसमध्ये भारतीय समुदायातील मान्यवरांसोबत दिवाळी साजरी केली. या कार्यक्रमात भारतीय उद्योजक विशाल गोंडल यांनी ट्रम्प यांना हनुमान चालीसेची प्रत भेट दिली. ट्रम्प यांनी यावेळी पारंपरिक पद्धतीने दिवा प्रज्वलित केला. शुक्रवारी (६ नोव्हेंबर) हा कार्यक्रम पार पडला.
विशाल गोंडल हे GOQii या हेल्थटेक कंपनीचे संस्थापक आणि मुख्य कार्यकारी अधिकारी आहेत. त्यांनी सोशल मीडिया प्लॅटफॉर्म ‘एक्स’वर या कार्यक्रमाचे फोटो शेअर केले. ‘ओव्हल ऑफिसमध्ये प्रकाशाचा एक सुंदर क्षण’, अशा शब्दांत त्यांनी या सोहळ्याचे वर्णन केले. तसेच, तुलसीदास यांनी रचलेली हनुमान चालीसा ही कोट्यवधी लोकांसाठी श्रद्धा, धैर्य आणि शक्तीचे प्रतीक असल्याचे सांगत ट्रम्प यांना तिची प्रत भेट दिल्याचे त्यांनी नमूद केले.
दिवा प्रज्वलित करताना भारत आणि अमेरिकेतील मैत्री अधिक दृढ व्हावी, तसेच अंधारावर प्रकाशाचा विजय व्हावा, अशी प्रार्थना केल्याचे गोंडल यांनी सांगितले. त्यांनी ‘जुग जुग जियो’ या पारंपरिक भारतीय शुभेच्छांचाही उल्लेख केला. जगभरातील लोकांना शांती, समृद्धी, उत्तम आरोग्य आणि दीर्घायुष्य लाभावे, अशी सदिच्छा त्यांनी व्यक्त केली.
हे ही वाचा:
व्हाईट हाऊसबाहेरून तीन बंदुकांसह व्हेनेझुएलाचा तरुण अटकेत
‘रामायण’चा पहिल्या दिवशी ६५ कोटींचा धमाका
उपमुख्यमंत्री एकनाथ शिंदे यांनी घेतली शरद पवारांची रुग्णालयात भेट
‘जलसा’ बॉम्बने उडवण्याची पुन्हा धमकी
या कार्यक्रमाला अमेरिकेतील भारताचे राजदूत विनय मोहन क्वात्रा, एफबीआयचे संचालक काश पटेल, प्रसिद्ध शेफ विकास खन्ना, आयबीएमचे सीईओ अरविंद कृष्णा, मायक्रॉन टेक्नॉलॉजीचे सीईओ संजय मेहरोत्रा आणि अमेरिकेच्या राष्ट्रीय आरोग्य संस्थेचे संचालक जय भट्टाचार्य उपस्थित होते. याशिवाय अमेरिकेचे परराष्ट्रमंत्री मार्को रुबिओ आणि इतर भारतीय वंशाचे उद्योजक आणि अधिकारीही सहभागी झाले होते.
