दिल्ली उच्च न्यायालयाने टेबल टेनिस फेडरेशन ऑफ इंडियाच्या कार्यकारी समितीच्या कामकाजाला स्थगिती दिली आहे. न्यायमूर्ती रेखा पल्ली यांच्या अध्यक्षतेखालील खंडपीठाने फेडरेशनच्या कामकाजावर देखरेख ठेवण्यासाठी प्रशासक नेमण्याचे आदेश दिले आहेत.
उच्च न्यायालयाच्या निवृत्त न्यायाधीशांची प्रशासक म्हणून नियुक्ती करण्याचे संकेत न्यायालयाने दिले आहेत. त्याशिवाय न्यायालय प्रशासकाव्यतिरिक्त आणखी दोन किंवा तीन व्यक्तींची नियुक्ती करणार आहे. न्यायालयाचा सविस्तर आदेश अपलोड झाल्यानंतर ही सर्व नावे समजणार आहेत.
न्यायालयाने मॅच फिक्सिंगचा आरोप असलेल्या राष्ट्रीय प्रशिक्षकाची चौकशी करण्यासाठी तीन सदस्यीय समिती स्थापन केली होती. टेबल टेनिस सामन्यांना प्रोत्साहन देण्याऐवजी फेडरेशन आपल्या अधिकार्‍यांचे हित जपण्यात गुंतले आहेत, असे या समितीने म्हटले होते. टेबल टेनिस फेडरेशन आणि त्याचे राष्ट्रीय प्रशिक्षक सौम्यदीप राय यांनीही त्याला प्रशिक्षक का करण्यात आले याचे कोणतेही स्पष्टीकरण दिलेले नाही. राष्ट्रीय प्रशिक्षकपदी नियुक्ती होऊनही सौम्यदीप राय स्वतःची अकादमी चालवत होता. त्यानंतर न्यायालयाने प्रशासक नेमण्याचे आदेश दिले.
यापूर्वी एकदा झालेल्या सुनावणीदरम्यान न्यायालयाने फेडरेशनला सुनावले होते की, खेळाडूंना त्रास देऊ नये. टेबल टेनिसपटू मनिका बत्रा हिला क्लीन चिट देण्याची सूचना न्यायालयाने टेबल टेनिस फेडरेशन ऑफ इंडियाला केली होती कारण तिच्याकडून कोणतेही गैरवर्तन झालेले नाही. १२ नोव्हेंबर २०२१ रोजी, न्यायालयाने टेबल टेनिसपटू मनिका बत्राला लक्ष्य केल्याबद्दल टेबल टेनिस फेडरेशनला फटकारले होते. खेळाडूंना लक्ष्य केले जाऊ नये आणि असे करणे ही गंभीर समस्या असल्याचे न्यायालयाने म्हटले होते. न्यायालयाने टेबल टेनिस फेडरेशनला आंतरराष्ट्रीय टेबल टेनिस फेडरेशन आणि ते यांच्यातील परस्परसंवादाचा अहवाल कोर्टात दाखल करण्याचे निर्देश दिले होते. सुनावणीदरम्यान बत्रा म्हणाले होते की, टेबल टेनिस फेडरेशन आपल्याला लक्ष्य करत आहे आणि आपल्याला आरोपीसारखे वागवले जात आहे. बत्राच्या या युक्तिवादाला टेबल टेनिस महासंघाने विरोध केला होता.
हे ही वाचा:
एबीजी शिपयार्डचा २२ हजार कोटींचा घोटाळा
शेट्टी बहिणींना आणि त्यांच्या आईला न्यायालयाचे समन्स
दुसऱ्या टप्प्याच्या मतदानापूर्वी काँग्रेसला आणखी एक धक्का
एबीजी शिपयार्डचा २२ हजार कोटींचा घोटाळा
टोकियो ऑलिम्पिकपासून मनिका बत्रा आणि फेडरेशनमधील संबंध खराब आहेत. मनिका टोकियो ऑलिम्पिकमध्ये राष्ट्रीय प्रशिक्षकाशिवाय खेळण्यासाठी आली होती, त्यामुळे महासंघाने तिला कारणे दाखवा नोटीस बजावली होती. मनिकाने ऑलिम्पिकमधील एकेरीत तिसरी फेरी गाठली. अशी कामगिरी करणारी ती पहिली भारतीय महिला टेबल टेनिस खेळाडू होती.
