पंतप्रधान नरेंद्र मोदी यांनी आपल्या मासिक रेडिओ कार्यक्रम ‘मन की बात’च्या १२४व्या भागात झारखंडमधील गुमला जिल्ह्यातील तरुण ओम प्रकाश साहू यांची प्रेरणादायी गोष्ट शेअर केली. त्यांनी सांगितले की, ओम प्रकाश यांनी कसा नक्षलवादाचा मार्ग सोडून मत्स्यपालनाच्या माध्यमातून स्वतःचे जीवन बदलले आणि आपल्या परिसरातही सकारात्मक परिवर्तन घडवून आणले.
पंतप्रधान मोदी म्हणाले: “माझ्या प्रिय देशवासीयांनो, अनेकदा सगळ्यात जास्त प्रकाश तिथूनच येतो जिथे सगळ्यात जास्त अंधार असतो. झारखंडमधील गुमला जिल्ह्याचे उदाहरण हेच सांगते. एकेकाळी हा भाग माओवादी हिंसाचारासाठी कुप्रसिद्ध होता. बसिया प्रखंडातील गावे ओस पडत होती. लोक भीतीच्या सावटाखाली जगत होते. रोजगाराची कुठलीही संधी नव्हती, शेतजमिनी पडून होत्या, आणि युवक स्थलांतर करत होते… पण या सगळ्या काळोखात एक शांत आणि संयमाने घडणारा बदल सुरू झाला. ओम प्रकाश साहू नावाच्या एका तरुणाने हिंसाचाराचा मार्ग सोडला आणि माशांच्या पालनाचा व्यवसाय सुरू केला. नंतर त्यांनी आपल्या इतर मित्रांनाही हेच काम सुरू करण्यासाठी प्रेरित केले. त्यांच्या प्रयत्नांना यश मिळाले. जे लोक पूर्वी हातात बंदूक घेत होते, आता त्यांनी मासेमारीचे जाळे हातात घेतले आहेत.”
हेही वाचा..
लाखो विद्यार्थी जोडले गेले इन्स्पायर मानक योजनेला!
राज ठाकरेंनी पुन्हा दाखविला दिलदारपणा…उद्धव ठाकरेंना शुभेच्छा देण्यासाठी पोहोचले ‘मातोश्री’वर
मेलबर्नमध्ये सौरभ आनंद यांच्यावर तलवारीने हल्ला
गाझामधील तात्पुरत्या युद्धविरामाला नेतन्याहूंची मान्यता
पंतप्रधान मोदींनी सांगितले की, ओम प्रकाश यांचा प्रवास सोपा नव्हता, अनेक अडथळ्यांनी भरलेला होता. “मित्रांनो, ओम प्रकाश साहू यांची सुरुवात सोपी नव्हती. त्यांना विरोध झाला, धमक्या मिळाल्या, पण त्यांची जिद्द कमी झाली नाही. जेव्हा ‘प्रधानमंत्री मत्स्य संपदा योजना’ सुरू झाली, तेव्हा त्यांना एक नवा आधार मिळाला. त्यांना सरकारकडून प्रशिक्षण मिळाले आणि तलाव खोदण्यास मदत मिळाली… आणि पाहता पाहता गुमलामध्ये मत्स्यपालन क्रांती सुरू झाली. आज बसिया प्रखंडातील १५० हून अधिक कुटुंबे मत्स्यपालनाशी जोडलेली आहेत. काही लोक तर पूर्वी नक्षलवादी संघटनांमध्ये होते, पण आता ते आपल्या गावी सन्मानाने जीवन जगत आहेत आणि इतरांना रोजगारही देत आहेत.”
पंतप्रधान मोदी म्हणाले “जे पूर्वी बंदूक हातात धरत होते, ते आता माशांची जाळी हातात घेत आहेत. ओम प्रकाश यांची कहाणी आपल्याला शिकवते की मार्ग योग्य असेल आणि मनात आत्मविश्वास असेल, तर कितीही कठीण परिस्थिती असली तरी परिवर्तन शक्य आहे. गुमलाचा हा बदल विकासाच्या शक्तीचे उत्तम उदाहरण आहे.”
