दिवाळीच्या पार्श्वभूमीवर केंद्र सरकारी कर्मचाऱ्यांसाठी आनंदाची बातमी आहे. केंद्र सरकारने आर्थिक वर्ष २०२५-२६ साठी पात्र केंद्रीय सरकारी कर्मचाऱ्यांना ३० दिवसांच्या वेतनाइतका अॅड-हॉक बोनस मंजूर केला असून, या बोनसची कमाल रक्कम ६,९०८ रुपये असणार आहे. दुसरीकडे, भारतीय रेल्वेतील पात्र कर्मचाऱ्यांना ७८ दिवसांचा उत्पादकतेशी निगडित बोनस देण्यात येणार आहे. या अंतर्गत कर्मचाऱ्यांना कमाल १७,९५१ रुपये मिळू शकतात. त्यामुळे सणासुदीच्या काळात कर्मचाऱ्यांच्या हातात अतिरिक्त पैसे येणार असून, त्यांना आर्थिक दिलासा मिळण्याची अपेक्षा आहे.
रेल्वेतील बोनस योजनेचा लाभ सुमारे ११ लाख ४० हजार ७७० पात्र कर्मचाऱ्यांना मिळणार असून, यासाठी केंद्र सरकारकडून एकूण २,००९.६१ कोटी रुपये वितरित केले जाणार आहेत. ट्रॅक मेंटेनर, लोको पायलट, ट्रेन मॅनेजर, स्टेशन मास्तर, तंत्रज्ञ, तंत्रज्ञ सहाय्यक, पॉइंट्समन, पर्यवेक्षक आणि मंत्रालयीन कर्मचाऱ्यांसह विविध पदांवरील पात्र कर्मचाऱ्यांचा या योजनेत समावेश आहे. रेल्वे कर्मचाऱ्यांच्या बोनसची गणना करताना मासिक वेतनाची कमाल मर्यादा ७,००० रुपये गृहीत धरली जाते. त्यानुसार ७८ दिवसांच्या बोनसची कमाल रक्कम १७,९५१ रुपये निश्चित करण्यात आली आहे. मात्र, प्रत्यक्ष बोनसची रक्कम कर्मचाऱ्याची पात्रता आणि लागू नियमांनुसार ठरेल.
हे ही वाचा:
“निवडणूक सुधारणांचा नव्हे, सत्ता बळकावण्याचा कट”
भारताच्या चालू खात्यातील तूट घटली
भारताच्या निर्यातीत २३ टक्क्यांची मोठी झेप
डोंगराळे चिमुरडी अत्याचार-हत्या प्रकरणी नराधम विजय खैरनारला फाशी!
दरम्यान, रेल्वे कर्मचाऱ्यांच्या बोनसची गणना करण्यासाठी वापरली जाणारी ७,००० रुपयांची वेतनमर्यादा वाढवून १८,००० रुपये करण्याची मागणी रेल्वेतील तांत्रिक पर्यवेक्षकांच्या संघटनेकडून करण्यात आली आहे. मात्र, या मागणीला सरकारने मंजुरी दिल्याची माहिती नाही. भारतीय रेल्वेने २०२५-२६ या आर्थिक वर्षात मालवाहतूक आणि प्रवासी वाहतुकीच्या क्षेत्रात उल्लेखनीय कामगिरी केल्याचे केंद्र सरकारने नमूद केले आहे. रेल्वेने १,६७० दशलक्ष टन मालवाहतुकीचा टप्पा गाठला, तर सुमारे ७.४१ अब्ज प्रवाशांनी रेल्वेने प्रवास केला. या कामगिरीत रेल्वे कर्मचाऱ्यांचे योगदान महत्त्वाचे असल्याचे सांगत त्यांना उत्पादकतेशी निगडित बोनस देण्यात येत आहे. एकीकडे केंद्रीय कर्मचाऱ्यांना ३० दिवसांच्या वेतनाइतका बोनस, तर दुसरीकडे रेल्वे कर्मचाऱ्यांना ७८ दिवसांचा बोनस मिळणार असल्याने दिवाळीच्या काळात लाखो कर्मचाऱ्यांना अतिरिक्त आर्थिक मदत मिळणार आहे.
