केंद्रीय गृहमंत्री अमित शाह यांनी रविवारी गुजरातमधील साबरमती रेल्वे स्थानकावर देशातील पहिल्या एलएनजीवर आधारित ड्युअल-फ्युएल ट्रेनला हिरवा झेंडा दाखवला. डिझेलसोबत द्रवरूप नैसर्गिक वायू म्हणजेच एलएनजीचा वापर करणारी ही ट्रेन भारतीय रेल्वेच्या इंधन बचत आणि पर्यावरणपूरक वाहतुकीच्या दिशेने महत्त्वाचे पाऊल मानले जात आहे. या ट्रेनमध्ये डिझेल आणि एलएनजी या दोन्ही इंधनांचा वापर करण्याची व्यवस्था करण्यात आली आहे. त्यामुळे डिझेलवरील अवलंबित्व कमी करण्यासोबतच इंधन खर्च आणि प्रदूषण कमी होण्यास मदत होण्याची अपेक्षा आहे. या तंत्रज्ञानाच्या वापरामुळे कार्बन उत्सर्जनातही घट होऊ शकते. या ट्रेनची चाचणी यशस्वी झाल्यानंतर ती सेवेत आणण्यात आली आहे. उद्घाटनानंतर ही ट्रेन साबरमती ते मेहसाणा मार्गावर धावली. रेल्वे क्षेत्रात पर्यायी इंधनाचा वापर वाढवण्याच्या प्रयत्नांचा हा एक भाग असल्याचे सांगण्यात आले.
या कार्यक्रमादरम्यान अमित शाह यांच्या हस्ते गुजरातमधील १,५४२ कोटी रुपयांहून अधिक खर्चाच्या विविध रेल्वे प्रकल्पांचे उद्घाटन, लोकार्पण आणि भूमिपूजन करण्यात आले. अहमदाबाद रेल्वे विभागातील सुमारे ४०४ किलोमीटर मार्गावर ‘कवच’ या स्वदेशी रेल्वे सुरक्षा प्रणालीचा विस्तार करण्यात आला आहे. सुमारे ४११ कोटी रुपये खर्चाच्या या प्रकल्पामुळे रेल्वेची सुरक्षितता वाढण्यास मदत होणार आहे. याशिवाय सुमारे १२२ किलोमीटर मार्गावर स्वयंचलित सिग्नलिंग व्यवस्था सुरू करण्यात आली आहे. साबरमती-सारखेज या सुमारे २१ किलोमीटर रेल्वे मार्गाच्या दुहेरीकरणाचे कामही हाती घेण्यात आले आहे. या प्रकल्पासाठी सुमारे ३१३ कोटी रुपयांचा खर्च अपेक्षित आहे. रेल्वे मार्गाचे दुहेरीकरण झाल्यानंतर या मार्गावरील गाड्यांची वाहतूक क्षमता वाढण्यास मदत होणार आहे.
हे ही वाचा:
२५ रुपये लिटर इंधनावर धावणार कार
बालाकोट ते ऑपरेशन सिंदूर…भारताकडे वाकड्या नजरेने पाहाल तर याद राखा!
पंतप्रधान मोदींनी ‘मन की बात’मध्ये केला राजिंदर सिंह यांचा गौरव
श्रीशंकर, पट्टुराज लॉन्ग जंपच्या अंतिम फेरीत
साबरमती येथे सुमारे ७०० कोटी रुपये खर्चून उभारण्यात आलेल्या डब्ल्यूएजी-१२ इलेक्ट्रिक मालवाहू इंजिनांच्या देखभाल केंद्राचेही यावेळी उद्घाटन करण्यात आले. हे केंद्र अत्याधुनिक सुविधांनी सुसज्ज असून मालवाहतूक करणाऱ्या शक्तिशाली इंजिनांची देखभाल येथे केली जाणार आहे. डब्ल्यूएजी-१२ हे भारतीय रेल्वेच्या शक्तिशाली मालवाहू इंजिनांपैकी एक असून त्याचा वापर मोठ्या प्रमाणावर मालवाहतूक करण्यासाठी केला जातो. एलएनजी ट्रेन, ‘कवच’ प्रणाली, स्वयंचलित सिग्नलिंग, रेल्वे मार्गाचे दुहेरीकरण आणि अत्याधुनिक देखभाल केंद्र अशा विविध प्रकल्पांमुळे गुजरातमधील रेल्वे पायाभूत सुविधांना मोठी चालना मिळण्याची अपेक्षा आहे. पर्यायी इंधनाचा वापर, रेल्वे सुरक्षेत वाढ आणि मालवाहतुकीची क्षमता मजबूत करण्याच्या दृष्टीने हे प्रकल्प महत्त्वाचे ठरणार आहेत.
