भारताच्या विदेशी चलन साठ्यात मोठी वाढ झाली असून, देशाच्या अर्थव्यवस्थेसाठी ही अत्यंत सकारात्मक बातमी आहे. १६ जानेवारीला संपलेल्या आठवड्यात भारताचा विदेशी चलन साठा तब्बल १४.१६७ अब्ज डॉलर्सने वाढून ७०१.३६० अब्ज डॉलर्स इतका झाला आहे. अलीकडच्या काळातील ही सर्वात मोठ्या वाढींपैकी एक मानली जात आहे.
यापूर्वी ९ जानेवारीला संपलेल्या आठवड्यात विदेशी चलन साठ्यात केवळ ०.३९२ अब्ज डॉलर्स (३९२ दशलक्ष डॉलर्स) इतकीच वाढ झाली होती. त्यामुळे ताज्या आकड्यांमधून देशात मोठ्या प्रमाणावर परकीय चलनाची आवक होत असल्याचे स्पष्ट होते.
हे ही वाचा:
कोरोना विषाणूची सुरुवात वुहानमधूनच
सोनं आणि चांदीचे दर आज पुन्हा उच्चांकावर
छगन भुजबळ महाराष्ट्र सदन घोटाळ्यात निर्दोष
परकीय गुंतवणूकदारांच्या विक्रीमुळे शेअर बाजार कोसळला
विदेशी चलन साठ्यातील सर्वात मोठा भाग म्हणजे फॉरेन करन्सी अॅसेट्स (एफसीए). १६ जानेवारीला संपलेल्या आठवड्यात एफसीएमध्ये ९.६५२ अब्ज डॉलर्स इतकी वाढ झाली असून, त्याची एकूण किंमत ५६०.५१८ अब्ज डॉलर्स झाली आहे. एफसीएमध्ये अमेरिकन डॉलरसोबतच युरो, पाउंड आणि येन यांसारख्या प्रमुख आंतरराष्ट्रीय चलनांचा समावेश असतो.
याच कालावधीत भारताच्या सोन्याच्या साठ्यातही वाढ झाली आहे. सोन्याची किंमत ४.६२३ अब्ज डॉलर्सने वाढून ११७.४५४ अब्ज डॉलर्स झाली आहे. आंतरराष्ट्रीय बाजारात सोन्याच्या दरात झालेली वाढ यामागील महत्त्वाचे कारण आहे.
दरम्यान, स्पेशल ड्रॉइंग राइट्स (एसडीआर) मध्ये ०.०३५ अब्ज डॉलर्स (३५ दशलक्ष डॉलर्स) इतकी घट होऊन त्याची किंमत १८.७०४ अब्ज डॉलर्स झाली आहे. तसेच आंतरराष्ट्रीय नाणेनिधीमध्ये (आयएमएफ) भारताची राखीव स्थिती ०.०७३ अब्ज डॉलर्सने (७३ दशलक्ष डॉलर्स) कमी होऊन ४.६८४ अब्ज डॉलर्स झाली आहे.
यापूर्वी ऑक्टोबर २०२५ मध्ये भारताचा विदेशी चलन साठा ७०२.२५ अब्ज डॉलर्स इतका होता, तर सप्टेंबर २०२४ मध्ये ७०४.८९ अब्ज डॉलर्स हा सर्वकालीन उच्चांक नोंदवण्यात आला होता.
तज्ज्ञांच्या मते, मजबूत विदेशी चलन साठा रुपयाचा दर स्थिर ठेवण्यास मदत करतो, आयात-निर्यात सुलभ करतो आणि देशाची अर्थव्यवस्था अधिक मजबूत बनवतो. वाढता विदेशी चलन साठा भारताच्या आर्थिक स्थैर्याचे स्पष्ट चित्र दाखवतो.
