सिगारेट ओढणाऱ्या ग्राहकांच्या खिशावर पुन्हा भार पडणार आहे. आयटीसी लिमिटेडने आपल्या लोकप्रिय सिगारेट ब्रँडच्या किमतीत वाढ केली असून, क्लासिक कनेक्ट आणि गोल्ड फ्लेक सुपर स्टार या उत्पादनांचे दर वाढवण्यात आले आहेत. क्लासिक कनेक्टच्या २० सिगारेटच्या पाकिटाची किंमत आता ३९० रुपयांवरून ४२८ रुपये झाली आहे. म्हणजेच एका पाकिटामागे ३८ रुपयांची वाढ झाली आहे. तर गोल्ड फ्लेक सुपर स्टारच्या १० सिगारेटच्या पाकिटासाठी आता ७९ रुपयांऐवजी ८९ रुपये मोजावे लागणार आहेत. नव्या किमतीचे पॅकेट बाजारात येण्यास सुरुवात झाली असून, जुन्या दराचा साठा संपल्यानंतर ग्राहकांना वाढीव किमतीचा फटका बसणार आहे.
सिगारेटच्या दरवाढीमागे तंबाखूजन्य उत्पादनांवरील वाढलेला करभार हे प्रमुख कारण मानले जात आहे. १ फेब्रुवारी २०२६पासून सिगारेट आणि इतर तंबाखू उत्पादनांवर ४० टक्के जीएसटीसोबत अतिरिक्त उत्पादन शुल्काची नवी रचना लागू करण्यात आली. त्यामुळे कंपन्यांवरील कराचा भार वाढला आहे. हा वाढलेला खर्च ग्राहकांकडून वसूल करण्यासाठी आयटीसीने टप्प्याटप्प्याने किमती वाढवल्या आहेत. यापूर्वीही याच वर्षात क्लासिक कनेक्ट आणि गोल्ड फ्लेकच्या किमती वाढवण्यात आल्या होत्या. त्यामुळे काही महिन्यांतच या लोकप्रिय ब्रँडच्या किमतीत लक्षणीय बदल झाला आहे.
हे ही वाचा:
अनंत नाग यांना दादासाहेब फाळके पुरस्कार जाहीर
बाल लैंगिक शोषणाच्या कंटेंटवर सरकारचा मेटाला इशारा
यूएईकडून ५ हजार बांगलादेशी नागरिकांचा व्हिसा रद्द
शस्त्रांसह व्हिडिओ पोस्ट करणारा ब्रिक्स सुरक्षेतील स्नायपर निलंबित
दरवाढीचा परिणाम केवळ ग्राहकांच्या खर्चावरच नव्हे, तर सिगारेटच्या विक्रीवरही होण्याची शक्यता आहे. किमती वाढल्याने काही ग्राहकांकडून खरेदीचे प्रमाण कमी होऊ शकते. तसेच वाढत्या करामुळे बेकायदेशीर किंवा करबाह्य सिगारेटच्या बाजाराला चालना मिळण्याची शक्यता असल्याचे आयटीसीने यापूर्वी नमूद केले आहे. त्यामुळे एकीकडे सरकारच्या करधोरणामुळे महसूल वाढण्याचा प्रयत्न होत असताना, दुसरीकडे कंपन्यांना वाढलेला करभार, ग्राहकांची मागणी आणि बाजारातील स्पर्धा यांचा समतोल साधावा लागणार आहे. मात्र सध्या ग्राहकांसाठी स्पष्ट चित्र एवढेच आहे की क्लासिक कनेक्ट आणि गोल्ड फ्लेक सुपर स्टारसाठी आता पूर्वीपेक्षा अधिक पैसे मोजावे लागणार आहेत.
