मुंबई विमानतळावरील टर्मिनल-१च्या पुनर्बांधणीच्या पार्श्वभूमीवर विमान वाहतुकीत मोठा बदल होण्याची शक्यता आहे. टर्मिनल-१वरील काम सुरू करण्यासाठी मुंबई विमानतळावरील काही आंतरराष्ट्रीय उड्डाणे नवी मुंबई आंतरराष्ट्रीय विमानतळाकडे वळवण्याची तयारी सुरू झाली आहे. २५ ऑक्टोबरपासून सुमारे २६५ आंतरराष्ट्रीय उड्डाणे नवी मुंबई विमानतळावर हलवण्याचे नियोजन आहे. जानेवारी २०२७पासून टर्मिनल-१ टप्प्याटप्प्याने बंद करून त्याची पुनर्बांधणी केली जाणार आहे. त्यामुळे टर्मिनल-१वरून प्रवास करणाऱ्या मोठ्या संख्येने देशांतर्गत प्रवाशांची जबाबदारी टर्मिनल-२वर येणार असून, त्याचा अतिरिक्त ताण कमी करण्यासाठी आंतरराष्ट्रीय उड्डाणे नवी मुंबईकडे वळवली जाणार आहेत.
या बदलाचा मोठा परिणाम विमान कंपन्यांवर होणार आहे. सुमारे ४६ विमान कंपन्यांच्या आंतरराष्ट्रीय उड्डाणांचा यात समावेश आहे. इंडिगोची सुमारे ७४, एअर इंडियाची ३३, आकासा एअरची ११ आणि एअर इंडिया एक्स्प्रेसची ७ उड्डाणे नवी मुंबईकडे वळवली जाण्याची शक्यता आहे. याशिवाय एमिरेट्स आणि एतिहादच्या प्रत्येकी १० उड्डाणांचाही समावेश आहे. मात्र, विमान कंपन्यांसमोर मोठे व्यवस्थापनाचे आव्हान उभे राहणार आहे. पायलट आणि केबिन क्रू, विमानांची देखभाल, खानपान, सामान हाताळणी आणि तांत्रिक सुविधांची व्यवस्था नव्या विमानतळावर करावी लागणार आहे. हिवाळी वेळापत्रकातील अनेक तिकिटे आधीच विकली गेल्याने अचानक बदल करणेही सोपे नसणार आहे.
हे ही वाचा:
जागतिक अर्थव्यवस्थेसमोर चार मोठे धोके
रेपो दरात ०.२५ टक्क्यांची वाढ झाल्याने कर्जदारांचा ईएमआय वाढणार
देशासमोर सत्ता, पद, प्रतिष्ठा काहीही मोठे नाही!
सोलापुरात डिटर्जंटयुक्त दूध, नवी मुंबईत रसायनमिश्रित केळी जप्त
नवी मुंबई विमानतळावरून प्रवास करणाऱ्या प्रवाशांसाठीही हा बदल महत्त्वाचा ठरणार आहे. मुंबई विमानतळाच्या तुलनेत नवी मुंबई विमानतळावरील वापरकर्ता शुल्क अधिक असल्याने विमान प्रवासाचा खर्च वाढण्याची शक्यता आहे. हा अतिरिक्त आर्थिक भार प्रवाशांवर पडू नये यासाठी कॅश व्हाउचर देण्याची व्यवस्था करण्याची तयारी असल्याचे सांगितले जात आहे. दोन्ही विमानतळांचे संचालन एकाच समूहाकडे असल्याने विमान कंपन्यांचे स्लॉट, प्रवाशांची वाहतूक आणि इतर सुविधांमध्ये समन्वय साधणे शक्य होणार आहे. विमान कंपन्यांना त्यांच्या पसंतीचे स्लॉट निवडण्याची संधी दिली जाणार असून, त्यानंतर उर्वरित स्लॉट विमानतळाची क्षमता लक्षात घेऊन निश्चित केले जातील.
टर्मिनल-१ची पुनर्बांधणी पूर्ण झाल्यानंतर मुंबई विमानतळाची प्रवासी हाताळण्याची क्षमता सुमारे ३३ टक्क्यांनी वाढण्याची अपेक्षा आहे. त्यामुळे भविष्यात मुंबई विमानतळावरील गर्दी आणि विमान वाहतुकीचा ताण कमी होऊन प्रवाशांना अधिक आधुनिक सुविधा मिळू शकतात. मात्र, पुनर्बांधणीच्या काळात मुंबई आणि नवी मुंबई या दोन्ही विमानतळांदरम्यान प्रवाशांची ये-जा, विमान कंपन्यांचे वेळापत्रक आणि जमिनीवरील वाहतूक व्यवस्थापन हे मोठे आव्हान ठरणार आहे. त्यामुळे येत्या काही महिन्यांत मुंबई महानगर प्रदेशातील विमान वाहतुकीचे केंद्र नवी मुंबईकडेही मोठ्या प्रमाणात सरकताना दिसणार आहे.
