योगगुरू बाबा रामदेव यांच्या नेतृत्वाखालील पतंजली आयुर्वेदने आता विमा क्षेत्रात मोठी झेप घेतली आहे. भारतीय विमा नियामक आणि विकास प्राधिकरण (IRDAI) ने पतंजली आयुर्वेद आणि डीएस ग्रुपच्या मॅग्मा जनरल इन्शुरन्स अधिग्रहणाला अंतिम मंजुरी दिली आहे. सुमारे ₹४,५०० कोटींच्या या व्यवहारामुळे पतंजलीची सर्वसाधारण विमा (General Insurance) क्षेत्रात अधिकृत एंट्री झाली असून, कंपनीच्या व्यवसाय विस्तारातील हा एक महत्त्वाचा टप्पा मानला जात आहे.
या व्यवहारानुसार, पतंजली मॅग्मा जनरल इन्शुरन्समधील ७३.५६ टक्के हिस्सेदारी ताब्यात घेणार असून डीएस ग्रुपकडे उर्वरित महत्त्वाची भागीदारी असेल. नियामकांची मंजुरी मिळाल्यानंतर पतंजली कंपनीची प्रमुख प्रवर्तक (Promoter) म्हणून जबाबदारी स्वीकारणार आहे आणि विमा व्यवसायाच्या विस्तारासाठी आवश्यक भांडवलाची गुंतवणूकही करणार आहे.
हे ही वाचा:
फेडच्या निर्णयानंतर सोन्याला झळाळी; चांदीत मात्र घसरण
पाकिस्तानात पोलिस चौकीवर झालेल्या हल्ल्यात नऊ पोलिसांचा मृत्यू
व्याजदर स्थिर, पण धोक्याची घंटा कायम!
खाण व्यावसायिकाच्या नातेवाईकाकडून २८ कोटींची रोकड, १५ किलो सोने जप्त
एफएमसीजी, आयुर्वेदिक उत्पादने आणि आरोग्य क्षेत्रात मजबूत उपस्थिती निर्माण केल्यानंतर आता पतंजली आर्थिक सेवा क्षेत्रातही पाय रोवण्याच्या तयारीत आहे. देशभरातील विस्तृत वितरण जाळे, लाखो ग्राहकांचा विश्वास आणि ग्रामीण भागातील मजबूत पोहोच यांचा फायदा घेत कंपनी विमा व्यवसायाचा वेगाने विस्तार करण्यावर भर देणार आहे. विशेषतः आरोग्य, वाहन आणि इतर सर्वसाधारण विमा उत्पादनांद्वारे नव्या ग्राहकांपर्यंत पोहोचण्याची रणनीती आखली जात आहे.
मॅग्मा जनरल इन्शुरन्सने गेल्या काही वर्षांत सातत्याने चांगली वाढ नोंदवली आहे. कंपनीने आर्थिक कामगिरीत सुधारणा करत नफ्यात पुनरागमन केले असून, या मजबूत पायावर पतंजली आता विमा व्यवसायात दीर्घकालीन विस्ताराचे लक्ष्य ठेवत आहे. या व्यवहारामुळे भारतीय विमा क्षेत्रातील स्पर्धा अधिक तीव्र होण्याची शक्यता असून, पारंपरिक विमा कंपन्यांसमोर एक नवा आणि प्रभावी प्रतिस्पर्धी उभा राहणार असल्याचे मानले जात आहे.
