दिल्लीतील जंतर-मंतर येथे ‘कॉकरोच जनता पार्टी’ (सीजेपी) च्या आंदोलनादरम्यान राजधानीत तणावाचे वातावरण निर्माण झाले आहे. नवी दिल्लीतील कनॉट प्लेस परिसरात, पीटीआय इमारतीजवळ आंदोलकांच्या एका गटाने पोलिसांवर दगडफेक केल्याची घटना समोर आली आहे. या घटनेत दोन पोलीस कर्मचारी जखमी झाले असून, पोलिसांनी सुमारे ५० आंदोलकांना ताब्यात घेतले आहे.
माहितीनुसार, पीटीआय इमारतीजवळ सुमारे ५० आंदोलक जमले होते. यावेळी आंदोलकांनी पोलिसांवर दगड फेकल्याचा आरोप आहे. या दगडफेकीत दोन पोलीस कर्मचारी जखमी झाले. घटनेनंतर पोलिसांनी तत्काळ कारवाई करत संबंधित सर्व आंदोलकांना ताब्यात घेतले.
मुख्य निवडणूक आयुक्त ज्ञानेश कुमार यांच्या विरोधात सीजेपीकडून जंतर-मंतर येथे आंदोलन करण्यात येत आहे. या आंदोलनाच्या पार्श्वभूमीवर दिल्ली पोलिसांनी राजधानीत कडक सुरक्षा व्यवस्था तैनात केली आहे. विविध ठिकाणी बॅरिकेडिंग करण्यात आले असून, आंदोलकांच्या हालचालींवर लक्ष ठेवले जात आहे. अशा परिस्थितीत कनॉट प्लेसमधील पीटीआय इमारतीजवळ झालेल्या दगडफेकीमुळे तणाव वाढला आहे. घटनेनंतर पोलिसांनी परिसरातील परिस्थिती नियंत्रणात आणण्यासाठी कारवाई केली.
हे ही वाचा:
सौर वादळाचा पृथ्वीला तडाखा! भारतावर काय परिणाम?
कॉकरोचच्या आंदोलनापूर्वी ५० गुन्हेगारांसह ५०० जण ताब्यात
स्टारलिंकला परवानगी नाही, मस्क यांची अंबानींवर आगपाखड
दीपके, रांका, सौरव दासला पोलिसांनी विमानातच घेतले ताब्यात
दरम्यान, जंतर-मंतरवरील आंदोलनासाठी दिल्लीत दाखल झालेले पक्षाचे संस्थापक अभिजीत दीपके आणि त्याचे सहकारी सौरव दास व आशुतोष रांका यांना दिल्ली पोलिसांनी विमानातून उतरण्यापूर्वीच ताब्यात घेतले. मुख्य निवडणूक आयुक्त ज्ञानेश कुमार यांच्या राजीनाम्याची आणि एसआयआर प्रक्रिया रद्द करण्याची मागणी करण्यासाठी ते दिल्लीत आले होते. तर, यूट्यूबर ध्रुव राठी यालाही पोलिसांनी गुरुग्राममधील निवासस्थानातून ताब्यात घेतले. ध्रुव राठी याने आंदोलनापूर्वी दिल्लीतील सुरक्षा व्यवस्थेवर प्रश्न उपस्थित केले होते. त्याने राजधानीत जवळपास लॉकडाऊनसारखी परिस्थिती निर्माण झाल्याचा आरोप केला होता आणि नागरिकांना आंदोलनात सहभागी होण्याचे आवाहन केले होते.
