बिहारमध्ये काही दिवसांपूर्वी जमुई जिल्ह्यात दहावीच्या विद्यार्थिनीला रस्त्यावर अडवून तिच्याशी गैरवर्तन केल्याचा प्रकार समोर आला होता. १९ सप्टेंबरला कोचिंगहून परतताना विद्यार्थिनी आणि तिच्या वर्गमित्राला काही युवकांनी अडवल्याचा आरोप आहे. या घटनेचे व्हिडिओ सोशल मीडियावर व्हायरल झाल्यानंतर पोलिसांनी गुन्हा दाखल करून तपास सुरू केला. या प्रकरणात तीन अल्पवयीन आरोपींना ताब्यात घेण्यात आले असून, व्हिडिओच्या आधारे इतर आरोपींचा शोध सुरू करण्यात आला होता. राष्ट्रीय महिला आयोगानेही या घटनेची दखल घेत बिहार पोलिसांकडून कारवाईचा अहवाल मागवला होता.
जमुईची घटना ताजी असतानाच आता समस्तीपूरमध्येही अशाच प्रकारचा धक्कादायक व्हिडिओ समोर आला आहे. जगतसिंहपूर गावाजवळील बांध बायपास रोडवर एका तरुणीला काही युवकांनी घेरून तिच्याशी गैरवर्तन केल्याचा आरोप आहे. तरुणी एका तरुणासोबत तेथे थांबून फोटो काढत असताना काही युवकांनी तिला अडवल्याची प्राथमिक माहिती आहे. व्हायरल झालेल्या व्हिडिओमध्ये काही युवक तरुणीला पकडताना आणि तिला जाण्यापासून रोखताना दिसत असल्याचे वृत्त आहे. पोलिसांच्या प्राथमिक तपासानुसार ही घटना काही दिवसांपूर्वी घडली असण्याची शक्यता आहे.
हे ही वाचा:
विद्यार्थ्यांना सोडून ‘कॉक्रोच’ निवडणूक आयुक्तांच्या मागे
केंद्रीय कर्मचाऱ्यांना मोठा दिलासा
५०० कोटींच्या मानहानी नोटिशीला आदित्य ठाकरेंचे उत्तर
कर्जमाफीपासून वंचित राहिलेल्या शेतकऱ्यांनाही मदत करण्याची घोषणा
समस्तीपूर पोलिसांनी सोशल मीडिया मॉनिटरिंगदरम्यान २३ सप्टेंबरच्या रात्री हा व्हिडिओ पाहिल्यानंतर तातडीने तपास सुरू केला. घटनास्थळाची ओळख पटवल्यानंतर पोलिसांनी संबंधित आरोपींचा शोध घेतला आणि काही तासांत चार जणांना अटक केली. पोलिसांच्या माहितीनुसार, व्हिडिओतील पीडित तरुणी प्रथमदर्शनी अल्पवयीन असल्याचे दिसत असल्याने प्रकरणाची संवेदनशीलता लक्षात घेऊन संबंधित कलमांखाली गुन्हा दाखल करण्यात आला आहे. तसेच पीडितेची ओळख उघड होईल असा कोणताही व्हिडिओ किंवा मजकूर सोशल मीडियावर शेअर करू नये, असे आवाहन पोलिसांनी केले आहे.
