मेटा इंडियाच्या प्लॅटफॉर्मवर बाल लैंगिक शोषण आणि गैरवापराशी संबंधित साहित्य (CSEAM) उपलब्ध असल्याप्रकरणी दिल्ली पोलिसांनी एफआयआर दाखल केला. राष्ट्रीय मानवाधिकार आयोगाच्या (NHRC) निर्देशानंतर ही कारवाई करण्यात आली. आयोगाचे सदस्य प्रियांक कानूंगो यांनी एक्सवरील पोस्टद्वारे ही माहिती दिली. मेटा इंडियाद्वारे चालवल्या जाणाऱ्या प्लॅटफॉर्मवर अशा प्रकारचे साहित्य उपलब्ध असल्याबद्दल गुन्हा नोंदवण्यात आल्याचे त्यांनी स्पष्ट केले.
बाल लैंगिक शोषणाशी संबंधित सामग्रीचा प्रसार आणि वापरकर्त्यांना बेकायदेशीर कंटेंटकडे वळवण्यासाठी ऑनलाइन जाहिरातींचा वापर होत असल्याच्या आरोपांमुळे सोशल मीडिया प्लॅटफॉर्म तपासाच्या कक्षेत आले आहेत. यापूर्वी १६ सप्टेंबर रोजी राष्ट्रीय बाल हक्क संरक्षण आयोगाने (NCPCR) या प्रकरणाच्या चौकशीसाठी मेटा इंडियाचे व्यवस्थापकीय संचालक आणि प्रमुख यांना समन्स बजावले होते.
हे ही वाचा:
दिल्लीमध्ये हवेच्या गुणवत्ता निर्देशांकाने ५०० चा टप्पा ओलांडला
इंडी आघाडीच्या रॅलीचा व्यापाराला फटका; देशव्यापी ‘धिक्कार दिन’ पाळणार
इराणला तेल निर्यातीत मदत केल्याप्रकरणी भारतीय दाम्पत्यावर निर्बंध
अग्निवीरांचा सेवाकाळ चार वरून सहा वर्षे!
दरम्यान, मेटाने जानेवारी ते जून २०२६ या सहा महिन्यांच्या कालावधीत भारतातील फेसबुक आणि इन्स्टाग्रामवरील बाल लैंगिक शोषणाशी संबंधित ५३ लाख कंटेंटवर कारवाई केली. ऑनलाइन शिकारी कारवाईपासून वाचण्यासाठी जाहिरातींचा वापर करत असल्याचे कंपनीने म्हटले आहे. या जाहिराती निरुपद्रवी असल्याचे भासवून वापरकर्त्यांना बाह्य वेबसाइट्सवरील बेकायदेशीर सामग्रीकडे वळवले जाते. अशा प्रकारच्या गैरप्रकारांना आळा घालण्यासाठी भारतीय सायबर गुन्हे समन्वय केंद्राच्या राष्ट्रीय सायबर गुन्हे अहवाल पोर्टलवर बालसुरक्षेशी संबंधित प्रकरणांची थेट माहिती देण्याचे आश्वासनही मेटाने दिले आहे.
