हैदराबादमध्ये लष्कराच्या युनिटमधून शस्त्रास्त्रे आणि मोठ्या प्रमाणात काडतुसे चोरी केल्याप्रकरणी एका माजी लष्करी हवालदाराला अटक करण्यात आली आहे. आरोपीने सिकंदराबाद कॅन्टोन्मेंटमधील २० मद्रास रेजिमेंटच्या युनिटमधून शस्त्रे आणि जवळपास १,९०० काडतुसे चोरल्याचा आरोप आहे. पोलिसांनी चोरीचा संपूर्ण साठा जप्त केला आहे.
पोलिसांनी आरोपीची ओळख उप्पुथोल्ला मल्लेश, वय ३७ वर्षे, अशी केली आहे. मल्लेश २०१० मध्ये लष्करात दाखल झाला होता. ३० जून २०२६ रोजी तो लष्करातून निवृत्त झाला. पोलिसांच्या प्राथमिक तपासानुसार, लवकर निवृत्ती मिळाल्यामुळे नाराज असल्याने त्याने हे कृत्य केल्याचा संशय आहे. मात्र चोरीमागील नेमका हेतू काय होता, याचा तपास अद्याप सुरू आहे.
माहितीनुसार, ३० आणि ३१ ऑगस्टच्या मध्यरात्री मल्लेशने सिकंदराबाद कॅन्टोन्मेंटमधील २० मद्रास रेजिमेंटच्या ‘कोट’ आणि ‘मॅगझिन’ रूममधून शस्त्रे आणि दारुगोळा चोरला. चोरीला गेलेल्या साठ्यात ४ AK-203 रायफल्स, १ INSAS रायफल, ७ पिस्तुले, मॅगझिन्स, एक पॅसिव्ह नाईट-व्हिजन बायनॉक्युलर आणि जवळपास १,९०० काडतुसे होती. चोरी केल्यानंतर मल्लेश आपल्या बालाजीनगर येथील घरी गेला. सीसीटीव्ही फुटेजनुसार तो पहाटे ४.३४ वाजता घरी पोहोचला. त्यानंतर त्याने चोरीचा साठा स्वतःच्या पांढऱ्या रंगाच्या ब्रेझा कारमध्ये ठेवला आणि पुढे अचमपेटच्या दिशेने रवाना झाला. पोलिसांच्या म्हणण्यानुसार, त्याने प्रवासादरम्यान टोल नाक्यांपासून बचाव करण्यासाठी काही मार्ग टाळले.
विशेष म्हणजे, प्रवासादरम्यान आपला अचमपेटकडे जाण्याचा वेगळा उद्देश असल्याचे भासवण्यासाठी त्याने कारमध्ये प्रवासीही घेतल्याचे तपासात समोर आले आहे. त्याने सागर रिंग रोडजवळून ४ जणांना घेतले आणि त्यांना देवरकोंडा येथे सोडले. त्यानंतर दिंडी येथे आणखी २ प्रवाशांना घेऊन त्यांना पुढे सोडले. या प्रवाशांकडून त्याने पैसेही घेतले. ३१ ऑगस्ट रोजी दुपारी सुमारे १.१५ वाजता तो अचमपेट येथे पोहोचला.
हे ही वाचा:
चॅट जीपीटीच्या मदतीने बनवले होते पंतप्रधान कार्यालयाचे बनावट ओळखपत्र
सुरक्षित समुद्री वाहतूक, कर्मचाऱ्यांची सुरक्षा सर्वोपरी
होर्मुझनंतर बाब-अल-मंदेब समुद्रधुनीही धोक्यात
मुंबईत एफडीएकडून पाच हॉटेल्सचे परवाने निलंबित
दरम्यान, पोलिसांचा संशय वाढल्यानंतर मल्लेश घाबरला आणि ६ सप्टेंबर रोजी त्याने संपूर्ण शस्त्रसाठा दुसऱ्या ठिकाणी हलवल्याचे पोलिसांनी सांगितले. अखेर १० सप्टेंबर रोजी त्याने चोरीची कबुली दिली. त्यानंतर हैदराबाद टास्क फोर्सच्या पथकांनी चोरीला गेलेला संपूर्ण शस्त्रसाठा आणि दारुगोळा जप्त केला.
