जम्मू-काश्मीरमध्ये काश्मिरी पंडितांना पुन्हा एकदा दहशतवाद्यांकडून धमकावण्यात आल्याची धक्कादायक माहिती समोर आली आहे. काश्मीर खोऱ्यातील काश्मिरी पंडित सरकारी कर्मचाऱ्यांची नावे, फोन नंबर, कार्यस्थळे आणि जम्मू-काश्मीरमधील त्यांच्या घरांचे अचूक पत्ते असलेली यादी सोशल मीडियावर प्रसारित करण्यात आल्याचे वृत्त आहे. या पार्श्वभूमीवर सुरक्षा यंत्रणा सतर्क झाल्या असून, संवेदनशील भागातील सुरक्षा वाढवण्यात आली आहे.
समोर आलेली धमकीची यादी लष्कर-ए-तोयबाशी (LeT) संबंधित असल्याचे मानले जाणाऱ्या ‘युनायटेड लिबरेशन कौन्सिल’ (ULC) या संघटनेशी जोडली जात आहे. या कथित धमकीपत्रांमध्ये लक्ष्य करण्यात आलेल्या कर्मचाऱ्यांची नावे, मोबाईल क्रमांक, घरांचे पत्ते आणि रस्त्यांची माहितीपर्यंत नमूद असल्याचे सांगण्यात येत आहे. या यादीत पंतप्रधान पुनर्वसन पॅकेजअंतर्गत (PMRP) काश्मीर खोऱ्यात कार्यरत असलेल्या काश्मिरी पंडित कर्मचाऱ्यांचाही समावेश असल्याचे वृत्त आहे.
यावेळी समोर आलेली यादी आधीच्या धमक्यांपेक्षा अधिक तपशीलवार असल्याचे सांगण्यात येत आहे. काश्मीर खोऱ्यातील कर्मचाऱ्यांसोबतच जम्मूमध्ये राहणाऱ्या काश्मिरी पंडित कुटुंबांच्या घरांचे अचूक पत्ते आणि घर क्रमांकाची माहितीही यामध्ये असल्याचा दावा करण्यात आला आहे. धमकीच्या संदेशांमध्ये काश्मीर खोऱ्यात परतलेल्या काश्मिरी पंडितांना अपमानास्पद शब्दांचा वापर करून लक्ष्य करण्यात आल्याचेही वृत्त आहे. या धमक्यांचा उद्देश काश्मिरी पंडितांच्या पुनर्वसनाच्या प्रक्रियेला अडथळा आणणे आणि खोऱ्यात परतण्यास परावृत्त करणे असू शकतो, अशी शक्यता व्यक्त केली जात आहे.
काश्मिरी पंडित कर्मचाऱ्यांना धमकी देण्याची ही पहिलीच घटना नाही. याआधीही अशाच प्रकारच्या धमक्या समोर आल्यानंतर प्रशासनाने काश्मिरी पंडित कर्मचाऱ्यांना काही काळ ‘वर्क फ्रॉम होम’ची सुविधा दिली होती. तसेच खोऱ्यातील ट्रान्झिट कॅम्प आणि सरकारी कार्यालयांची सुरक्षा वाढवण्यात आली होती. ऑगस्टच्या सुरुवातीलाही काश्मिरी पंडित कर्मचाऱ्यांना लक्ष्य करणाऱ्या धमक्यांनंतर प्रशासनाने सुरक्षा परिस्थितीचा आढावा घेतला होता. काही कर्मचाऱ्यांना २५ ऑगस्टपर्यंत घरून काम करण्यास सांगण्यात आल्याचे वृत्त आहे.
हे ही वाचा:
३० हजार कोटींच्या ‘डिजिटल अरेस्ट’ रॅकेटप्रकरणी मुंबईत दोघांना अटक
वंधामातील २३ काश्मिरी पंडितांच्या हत्येचे गूढ उलगडणार?
बलुचिस्तानात पाक सैन्यावर हल्ला; १३ ठार
इम्रान खान यांच्यासाठी २१ माजी कर्णधार एकवटले
नव्या धमकीच्या पार्श्वभूमीवर जम्मू आणि काश्मीर या दोन्ही भागांमध्ये सुरक्षा व्यवस्था अधिक कडक करण्यात आली आहे. सुरक्षा यंत्रणा धमकीची सत्यता, यादीमागील सूत्रे आणि ती तयार करणाऱ्या व्यक्ती किंवा संघटनेचा शोध घेत आहेत. दरम्यान, जम्मू-काश्मीरमध्ये दहशतवादी नेटवर्कविरोधात सुरक्षा यंत्रणांची कारवाईही सुरू आहे. अलीकडेच राष्ट्रीय तपास संस्थेने (NIA) लष्कर-ए-तोयबाच्या पाकिस्तानस्थित हँडलर्सशी संबंधित नेटवर्कचा तपास करण्यासाठी काश्मीरमधील १० ठिकाणी झडती घेतली होती.
