म्यानमारमधील सशस्त्र गटांना ड्रोन युद्धाचे प्रशिक्षण दिल्याच्या कथित प्रकरणात अमेरिकन नागरिक मॅथ्यू अ‍ॅरॉन व्हॅनडाइक भारतात परतला असून, शुक्रवारी त्याने दिल्लीतील न्यायालयात हजेरी लावली. एका महिन्यासाठी मायदेशी जाण्याची परवानगी मिळाल्यानंतर तो भारतात परतला आहे. या प्रकरणाचा तपास राष्ट्रीय तपास यंत्रणा (एनआयए) करत आहे.
व्हॅनडाइकसह सहा युक्रेनियन नागरिकांना मार्च २०२६ मध्ये एनआयएने अटक केली होती. या सात जणांनी मिझोराममार्गे म्यानमारमध्ये प्रवेश करून तेथील लष्करी राजवटीविरोधात लढणाऱ्या वांशिक सशस्त्र गटांच्या सदस्यांना ड्रोन युद्ध, ड्रोन चालवणे, ड्रोनची जोडणी आणि त्यांची संपर्क यंत्रणा जॅम करण्याचे प्रशिक्षण दिल्याचा आरोप एनआयएने केला आहे. हे प्रशिक्षण सुमारे तीन महिने चालल्याचा तपास यंत्रणेचा दावा आहे.
व्हॅनडाइकला १३ मार्च रोजी कोलकाता विमानतळावरून बेकायदेशीर कृत्ये प्रतिबंधक कायद्यांतर्गत (यूएपीए) अटक करण्यात आली होती. त्याच दिवशी सहा युक्रेनियन नागरिकांनाही अटक करण्यात आली. मात्र, तपासासाठी निर्धारित १८० दिवसांच्या कालावधीत यूएपीएअंतर्गत आरोपपत्र दाखल न झाल्याने न्यायालयाने व्हॅनडाइक आणि इतर आरोपींना डिफॉल्ट जामीन मंजूर केला.
हे ही वाचा:
तिघांच्या हत्येप्रकरणी दहशतवाद्याला दुहेरी जन्मठेप
हवामान संकटाला विकसित देश जबाबदार
अरुणाचलच्या सीमेवर चीनसोबत सीमावर्ती संघर्ष कायम
उत्तर प्रदेशच्या पिलीभीतमधील मतदार यादीतील १०,४७० नोंदींमध्ये फेरफार
सप्टेंबरमध्ये दाखल केलेल्या आरोपपत्रात एनआयएने आरोपींविरोधात इमिग्रेशन अँड फॉरेनर्स कायद्यांतर्गत आरोप ठेवले आहेत. यूएपीएअंतर्गत तपास मात्र सुरूच असल्याचे यंत्रणेने स्पष्ट केले आहे. न्यायालयाने आरोपींना एका महिन्यासाठी त्यांच्या मायदेशी जाण्याची परवानगी देताना गरज पडल्यास तपासात सहभागी होण्याची अट घातली होती. या प्रकरणात म्यानमारमधील चिन नॅशनल फ्रंट आणि काचिन इंडिपेंडन्स आर्मी या सशस्त्र गटांच्या सदस्यांना प्रशिक्षण दिल्याचा आरोप आहे. या गटांना भारतातील ईशान्येकडील बंडखोर संघटनांशी संबंध असल्याची शक्यता तपासली जात आहे.
